絲絲講場：嚐‧高美夫妻檔夠Sweet
一八年頭，經常聽到得獎嘅音樂人、歌手喺樂壇頒獎禮上面「多謝太太！」，估唔到喺尋日（二日）新股發布會上面，都一樣聽到咁Sweet嘅愛的宣言。之唔係嚐‧高美集團（08371）呢對夫妻檔囉，主席黃毅山仲多次多謝太太，即係集團行政總裁（CEO）陳慧珍。
所謂「夫妻同心，其利斷金」，家陣有唔少上市公司其實都係夫妻檔起家，好似飛達控股（01100）主席顏禧強及副主席顏寶鈴、SOHO中國（00410）主席潘石屹及CEO張欣、澳至尊（02031）主席蔡志輝及執董何家敏，同埋衍生集團（06893）主席彭少衍同執董關麗雯，都堪稱係上市公司嘅「模範夫妻」。
主席愛創新 太太辭工撐
講番嚐‧高美，黃主席就話，多得賢妻十年前辭職唔做教師，幫手打理公司生意，仲肯作多方嘅嘗試，收銀、樓面等通通唔介意親力親為，先可以令大家喺短時間之內學習做到飲食業咁話。原來黃氏伉儷都唔係飲食出身，平時亦唔多下廚，全因黃主席鍾意設計創新，先至會投身創業行列。
家陣黃主席發揮所長，約十年時間就創立六個自家飲食品牌，由越式、日式、中式同西式料理都未夠。
今次上市集資更打算擴張香港版圖，未來三年希望開設八間分店，仲講明唔排除因應市場創立更多新品牌。所以黃主席連介紹公司上市大計，都在自家日式火鍋店「牛氣」，睇嚟想寄望公司前景同店名一樣，「牛氣」沖天！
余絲韻