Market Insight：內房股暫只可短炒

調控政策隨時升級

美銀美林估計恒大今年銷售額可以超過5,000億元人仔（首11個月為4,704億人仔），睇好積極拓展範圍的同時，實施「規模+效益型」戰略，目標價睇33元，比尋日收市價25.6元高兩成八。近排講過幾次，內地樓市調控有升級風險，唔多睇好內房股強勢可以延續到一八年，短炒可以，但估值唔平作中長線投資的吸引力已有限。

融創向樂視影業注資，持股升至40.75%，超過16.36%的樂視成為最大股東，作價未見披露，公開資訊是樂視前董事長賈躍亭避走美國，正被中國官方勒令回國。若非善忘，年初融創向樂視注資百幾億元人仔，似乎凍過水，呢個時候繼續燒銀紙，是否倒錢落海大家心裏有數。

今年首十一個月賣樓套現超過3,000億元人仔的融創，嚟香港伸手，古勝無能力睇得透乜玩法，不過股市老生常談，上市企業在業績輝煌周期，主理人贏得興起，四周圍搵非本業投資往往無好結果，睇見樂視情況，融創都係避一避好。

假期效應 市靜屬正常

無外遊繼續留守的，都預咗假期前後個市會靜局，期指結算前夕，恒指高開升穿唔29,700黠大關，埋單升19點收29,597點，連升三個交易日都算有交代，可惜A股走勢又再轉弱，國指無運行跌35點，收報1,1617點。

一七年港股進入最後倒數，今年食到飽的港股基金掌舵人都無心戀戰，同個市搏到最後，尋日恒指早市上過29,693點，創過十二月新高之後，全日無方向。股王騰訊（00700）早市衝上407.8元之後，倒跌撻落401.2元收市，跌4.6元或1.1%。

焦點股方面，比亞迪（01211）成立合資公司建設年產3萬噸電池級碳酸鋰項目，預計總投資額達48.49億元人仔。同時，財政部等宣布，明年開始至二○二○年，對購置新能源車免徵車輛購置稅，比亞迪股價一度升近一成去到70.8元，收市升5.8%報68.3元。

蘋果概念股無運行

華爾街科技龍頭股蘋果公司個幾星期前自爆，將舊型號iPhone因應電池新舊情況，以軟件調節運算速度，話就話要避免老爺iPhone自動熄機，不過果粉門強勁反彈，認為是刻意逼用家換新機的伎倆，掀起多宗消費者集體訴訟。

網站見舊iPhone無保養，換電不過收635蚊，今趟蘋果遲遲唔回應，結果boxing day（二十六日）重開，加埋iPhone X的銷量不及預期的報道，股價在美國插咗2.5%，令全球最大市值公司唔見咗228億美金，相等於約1,778億港元，呢鋪公關災難都算貴，計一計已經足夠同2.8億部舊機換過舊新電。

尋日本地靠蘋果概念支撐的科技股，統統跌到七個一皮，染藍後未好過的舜宇光學（02382）再跌4.6%，收報94.95元，十一月高位為152.6元，一個半月由天堂直插地獄，累積失去三成七市值，瑞聲科技（02018）跌3.6%，丘鈦科技（01478）跌4%，高偉電子（01415）亦跌3.3%。

古勝