Market Insight：北水掃貨港股翻生

歸根究柢，騰訊已成為北水來去的指標，騰訊有運行，即係有北水到，港股便有水到，缸邊友又加強入市信心！市後數據確實顯示，騰訊錄得港股通淨買入約8.6億元人民幣，唔到你唔服。

除咗騰訊，昨日濠賭股、中國平安保險（02318）、港交所（00388）都高收作結。老實講，依家細價股腥風血雨，資金都去晒炒重磅股輪證。不過，投資細價股做錯邊，心態上公司唔停牌唔執笠都有得守，輪證有期限，到期到價就變廢紙，呢個角度睇風險不比細價股少，偏偏如今監管之風不利細價股，炒友冇得揀。輪證市場賭場愈嚟愈大，輪商要因應街貨量買賣，有機會影響相關正股表現。

藍籌股中，其中一隻表現唔跟市況行的藍籌，乃中國移動（00941），昨日跌0.13%報75.9元，真係吹脹。要解釋，應該係跌市時資金尋求避險，中移憑着每年可觀的經營現金流、穩定的息率成避險對象；當市況向好時，資金追求較高回報，中移呢隻大牛龜拉牛上樹自然唔係焦點。所以喺股民眼中，中移表現係指數升跌反指標的說法，又確實有其道理。

兩極化現象唔健康

古勝有感，其實股市中大型重磅股主宰市況，小型股估值低迷無人吼的現象，唔單只喺香港股市見到，A股、美股亦如是。兩極化已是全球股市現象，且不僅限於股市，就如最近北京市將低端人口趕出城，兩極化同樣體現於社會現象。

總而言之，上唔到主流，被會被唾棄，中間本來能讓低端群有機會升呢的台階，正逐漸消失！呢個現象，講真唔係咁健康，對經濟、對社會的發展都並非好事。

港交所表現太過慢熱

講開又講，昨日中午同卜架好友食飯，佢話呢排啲金融圈「趴地」排得滿滿，係近年少見。皆因今年港股表現係過去十年最好，唔少基金公司都賺錢，節慶活動花費當然會疏爽啲。事實上，單係第四季港股成交持續上升，十一月六日以來大市每日成交額均過千億，卜架行業都可以得益。偏偏港交所股價都仲係表現得太「矜持」，其他券商股直頭冇咩點炒過，照計呢個情況遲早要作出修正。

石藥長線值得捧場

今年港股丁財兩旺，港股基金表現好，外界眼中芬佬好易交差，偏偏實際上卻可能是啞子吃黃連。點解？皆因今年只要揸住隻騰訊，就可以坐享逾倍的投資回報；即使買指數基金，今年以來恒指最多升37%，賺錢好似冇大難度！

對於追求絕對回報的對沖基金，表現若只能與大市同步，芬佬被客戶埋怨一啲都唔出奇；表現差過大市，仲要預咗有客要提錢走。所以話，對芬佬而言，升市都有升市的苦惱！

板塊方面，年尾醫藥股似乎要標尾會，其中石藥集團（01093）股價上月中旬見高位16.7元後，反覆調整，惟在守穩50日線下，上周四開展反彈浪，昨日更一連收復10日及20日線，彈力十足。

事實上，石藥係一隻優質醫藥股，公司正研究分拆從事製銷咖啡因（食品添加劑及原料藥）及維生素C及飲料等在內地上市，若然搞得成功，石藥的估值將得到更佳體現，長線值得繼續捧場。

古勝