絲絲講場：AI搶完你飯碗仲識氹番你

印度IT精英多數係男人，飯碗打爛唔止冇錢，連社會地位都冇埋，所以好多人會幫襯網上心理輔導平台。

最近就有初創企業以AI支援嘅Chatbot提供輔導，換言之聽閣下傾訴畀反應你鼓勵你嗰個，完全係AI！其中較出名嘅Chatbot係企鵝造型嘅Wysa，有科技公司經理同Wysa企鵝傾完心事後話：「覺得佢聽我講同明白我！」

窩心成咁，何止爭飯碗，直頭同你爭仔爭女一樣得！法國廣告公關集團Havas最近調查發現，年齡介乎18至34歲嘅年輕人，有超過25%表示願意同機械人拍拖。

Havas就大家對未來技術發展嘅態度等進行調查，全球訪問咗1.2萬人。結果顯示，18至34歲嘅人當中，27%認為與機械人做朋友、拍拖係好正常。喺英國，願意同機械人拍拖嘅男性數量係女性嘅三倍。報告仲話，比起真實關係，男性較女性更愛網絡社交。

余絲韻