絲絲講場：日清上市「畀足面」仍跌5%
即食麵「出前一丁」生產商日清食品（01475）尋日首日掛牌，喺上市儀式上，公司送咗包一比一鍍金版「出前一丁」畀港交所作為禮物，雖然唔知實際價值，但絲絲目測應該起碼夠買一年分量嘅「出前一丁」。
除咗貴重禮物外，佢哋仲搵咗生招牌「清仔」出嚟撐場，清仔一出場，現場人士就爭住排隊同清仔影相打卡。雖然清仔個個都爭住影，但日清股份尋日似乎唔夠清仔咁受歡迎，股價就算清仔嚟撐場都撐唔起，全日潛水，收報3.37元，較招股價3.54元跌4.8%。
不過佢哋董事長兼首席執行官安藤清隆好樂觀咁話，公司業務喺香港市場市佔率超過六成，遲啲仲會推出粟米片等新產品，為消費者帶嚟驚喜咁話喎！
守益首掛挫18%
除咗幾乎人人都食過嘅日清外，尋日仲有兩隻新股上場。新加坡「過江龍」機電工程設計及建造承包商守益控股（02227）收報0.69元，較招股價0.85元跌18.8%。而三隻新股表現最好嘅係內地物業管理公司浦江中國（01417），收報1.6元，較招股價1.55元升3.2%。
尋日上市嘅新股表現就認真麻麻，臨近年尾，希望呢股氣氛唔好繼續啦！
余絲韻