孖妹S檔案：癲市「三高」2018有排Chok
青春係年輕人有嘅本錢，患高血糖、高血脂同高血壓嘅機會率照計係低啲，所以活潑好動嘅孖妹都唔太擔心。不過，今年有另一個「三高」，搞到孖妹騰騰震，血壓急升！今年科網股、樓價同比特幣都升到砰砰聲，但呢「三高」有咩隱憂，一八年會爆上定係爆破？等我哋問問專家先。
黃：中大全球政治經濟社會科學碩士課程客席講師 黃元山
卓：著名星級分析員卓百德（Peter Churchouse）兒子 卓太馬（Tama Churchouse）
Alicia：法國外貿銀行（Natixis）亞洲區首席經濟學家 Alicia Garcia Herrero
科網股 各有困境 明日之星難估
Kitty：你睇我幾Fit？
彩兒：唔好以為瘦就係Fit，瘦都可以有三高。唔講你住，香港一七年金融市場面對嘅三高包括科網股、樓價同比特幣，爆晒錶！
黃：三高都有同一源頭，都係因全球狂印銀紙，大量資金流出，炒起咗香港樓市、科網股同虛擬貨幣。所以，今年若大家嘅投資組合無以上資產，就會跑輸大市。
Kitty：我就係唔好彩嗰個。
黃：單睇科網股，佢依家嘅高估值都部分反映咗長遠預期。10年前，大家唔會覺得共享經濟咁勁，但又真係實現。唔排除人工智能（AI）嘅應用，喺嚟緊10年對我哋嘅生活方式，包括購物、乘車、食物快送等帶嚟重大革新。
依家Facebook、亞馬遜、Google、百度、阿里巴巴、騰訊控股（00700），真係愈大愈強，愈強愈大。邊際效用遞減亦唔啱用，因為消費量增加，但消費者都冇話唔願意畀咁貴。
彩兒：所謂有賭未為輸，用你嘅神聖之手，點隻未來10年之星嚟。
黃：咪話10年，一八年之星都難估。阿里都面對同一個問題，佢狂收購，但主要盈利仲係嚟自其主營嘅網購業務。
過去IBM嘅個人電腦強勢畀微軟取代；但微軟嘅搜尋器又鬥唔過Google；Google又冇諗到Facebook嘅社交媒體可以做得咁成功。
AI十年內殺入港中小企
Kitty：可唔可以Update吓我，近排有咩投資界潮嘢？
黃：金融科技已大大改造金融業，其他行業包括教育、醫療等，預計都會開始應用AI。依家唔使返學都可以上堂，啲堂仲可以由國際頂尖嘅行內專家教授。所以，無可否認喺教學上運用AI可以因材施教，達致高效。若合乎成本效益，又容易用，喺10年內，香港中小企都可以應用到。唯一減慢AI嘅滲透性，就係監管同法規，但就算國家如韓國實行保護主義，都難改變呢個大趨勢。
彩兒：係咪要買定啲科網股？但近排又曾出現科網小股災，我都諗過入市！
黃：買科網股都有危機。一旦環球動盪，資金緊縮，出現股災唔出奇。
Kitty：唔講投資，先諗吓我哋個飯碗，保唔保得住？
黃：唔好以為識寫程式嘅科技人最掂，佢哋先最危，AI好快學識。至於你哋，識寫手靚字，我估冇咁快畀人取代啩。始終同啲個人天賦有關嘅工種，仲有優勢。不過，隨遇而安喇。
彩兒：硅谷研究緊推出劃一基本收入，畀一個保護網，減低機械人同AI對取代舊工作嘅衝擊。你可以發吓夢先。
比特幣 勢再癲 料見66000美元
彩兒：比特幣今年仲癲，上周價格曾爆升至接近2萬美元，佢嘅市值係Facebook市值嘅一半！
Kitty：比特幣日日升，人哋做暴發戶，我得個恨字。
黃：比特幣嘅區塊鏈技術係堅，但股神巴菲特講得啱，投資比特幣好高風險！比特幣唔係一個投資資產。投資農地，農地會生產玉米；投資債券，債券會生產債息；但投資比特幣，佢唔識生啲「比特仔」，即係佢哋都冇內在價值，所以炒比特幣，好容易接火棒。
另外，比特幣有好多競爭對手，亦唔係個個國家都咁歡迎佢；價格波幅又大。All-in嘅朋友仔要三思。我建議買少少比特幣，當學嘢，了解佢嘅玩法就夠。
Alicia：目前所有虛擬貨幣都係由私人投資者所擁有，未有中央銀行撐住，即佢未成為主流付款工具，其價格仲係好波動同冇保障。
僅宜小注 留意監管
彩兒：Tama作為一家區塊鏈公司嘅董事，搞緊ICO（首次代幣發行）業務，佢好似有唔同睇法。
卓：有危自有機，我估一八年比特幣仲會升多3至4倍，觸及66,000美元。不過，飆得快，跌得亦快。比特幣價格波動超大，所以我建議最多用投資資產嘅5%買好喇，同埋投資前，你一定要知道自己做緊咩。
Kitty：到底虛擬貨幣係咪一個伏？
Alicia：又唔係！中國好有可能係第一個國家推出法定嘅虛擬貨幣，所以亦見中國監管機構點解唔鼓勵比特幣交易，仲要同佢劃清界線，以免影響日後自家虛擬貨幣嘅形象。
卓：我最近做咗個研究，發現有市值過億美元嘅加密貨幣真係一文不值。不過，一個市場有好有壞，我對加密貨幣市場仍有信心，估會續擴張，其一八年總市值會觸及1萬億美元。
彩兒：金融機構都對呢個市場虎視眈眈。
卓：另外，炒家要睇實各國監管機構對各個加密貨幣會有咩程度嘅監管，但制訂全新法規係需要啲時間。
樓市 供不應求難解成助力
Kitty：樓價高，同身高一樣，對女性嘅傷害應較少。
彩兒：身為一個獨立女性，我都想自己買樓。
黃：可惜依家唔係入市最好時機。以前仲話可以買細啲、舊啲，但近期樓價升咗咁多，呢啲樓嘅門檻都太高。
彩兒：係咪仲有排升？
黃：供不應求嘅問題，短期內難解決。過去10年私人住宅供應未達標，供應目標18,000個，但實質供應僅11,000個。所以就算未來幾年成功增加私人住宅供應，都唔會滿足過去累積嘅需求。
Kitty：喺香港，搵夠食唔難，搵夠住，真係好難。
黃：香港土地不足，過去香港公營房屋嘅供應比私樓供應更短缺，所以好難倣效新加坡嘅公營房屋政策。就算政府多次出辣招亦阻擋唔到樓市升勢。
信貸周期影響前景
彩兒：除咗基本因素，仲有咩因素影響樓市？
黃：資金因素。好似喺一五年，美元升值，人民幣貶值，新興市場價格動盪，中原樓價指數就由一五年年中嘅142，跌到一六年初嘅128。另香港樓市同香港及全球信貸周期息息相關，○八年利率已降到接近零，再降空間有限，惟有用量寬去延長信貸周期，但市場可以支撐個周期幾耐先見逆轉呢？因為邏輯上，借錢一定要還，但當中涉及好多人為因素，好難估幾時。
Kitty：你儲定彈藥先，等樓價調整就郁手。
早作部署 港股明年有危有機
Kitty：最怕「三高」高處不勝寒，可唔可以畀Tips我，做到進可攻，退可守？
黃：買被動指數，除港股指數外，仲要買埋環球股票嘅，咁先夠分散風險。
卓：若買指數，就話可以用總投資資產嘅15%，但若係個股，每隻佔3至4%好喇。一八年，我估BAT（百度、阿里巴巴、騰訊）嘅估價會升20至50%，表現好過美國科網股。因BAT壟斷全球增長最快速嘅中國市場，只要佢哋打埋入國際市場，就真係有排玩。
「H股全流通」勢利好
彩兒：一七年好景會唔會帶到一八年？
Alicia：一七年迎接科網股爆升周期，除咗見近排恒指由強轉弱；年尾科網股爆升勢頭或減弱，整體全球貿易及恒指都唔錯！
一八年有危有機。中證監磋商緊「H股全流通」，最快喺一八年首季推出，相信會吸引唔少內地公司喺H股上市，有助推高港股市值同流通量。但中國經濟增長放緩同埋中國債務沉重，令港股有下跌壓力。
彩兒、Kitty
若有料報畀彩兒同Kitty或有嘢問，可電郵money.biz@on.cc