Market Insight：加息受惠股趁機尋寶

近排恒指連續跌穿多條平均線，落到100日線至剎得住制，乃今年大升浪首見。30,199點係咪中短線高位，古勝唔敢妄下結論，但可肯定係，踏入十二月的港股，唔會好似之前十一個月咁順風順水，次次去到50日線即刻反彈，較樂觀是進入一個大範圍的上落市，入市致勝關鍵落喺選股身上。

大笨象攻守兼備

博股王同半新股翻炒，倒不如順應時勢，趁住美國再加息，在受惠股票中尋寶。好似銀行股及保險股，當利率回升，銀行息差收入改善，保險的投資收入亦然。唔信睇吓大笨象滙豐控股（00005），現價76.8元，同52周高位比較只係回咗2%左右，同今浪跌市幾近絕緣，反映早已經有資金在密密收集。

要知基金同散戶的最大分別，係唔可以清晒倉持有過多的現金，最多管理資產的3至4%，年底基金一輪投資組合大執位，最後一定坐番啲貨等埋年，滙控、渣打集團（02888）無疑是進可攻、退可守的佳選。內地長債息回升，不妨吼番中國太保（02601）及中國平安保險（02318）。

新經濟股隨時再落鑊

美國上周五公布十一月非農就業職位增加22.8萬個，勝市場預期的20萬個，失業率維持在4.1%，平均時薪升0.2%，則比預期稍低，可見就業市場強勁，招聘提薪的壓力卻十分有限。

騰訊再闖400元關

上周五道指升117點收報24,329點，再創收市新高，今個星期二、三聯儲局會開，加息幾成定局。上周五反彈336點的港股，期指夜市再下一城，升42點報28,662點，預示今朝大市極有機會高開。

港股定海神針騰訊控股（00700），當散字派前仆後繼，股價衝上接近440元高位，一場牛仔大屠殺，插到落365.2元，當牛仔打靶得七七八八，正股即彈是常識吧！

上星期短短兩日，抽上394元收市，周五一升就16蚊！周末中央政治局會議中提倡國家大數據戰略，話要加快建設數字中國，真係畀晒藉口新經濟股癲多浸。

不過，話說回頭，形勢一片大好之下，如果騰訊今個星期返唔到四舊樓上，咁就要小心。

內房股宜逐步減磅

近排內房股的十一月份銷售數據陸續出籠，假如升得太急真係唔值得追。一五年A股爆出股災，中央轉為托樓市避免經濟過快緊縮，結果一六年內地樓市升到爆燈，到十一假期前又再出手壓抑炒風，不過，壓得一、二線城市，資金又湧晒落三、四線炒樓，政府要睇住三至五線城市大量吉樓去庫存，惟有「暗啞底」唔出招。

今年內房銷售熱爆，內房股業績勁升幾可肯定成事實。不過，股市投資未來唔係過去輝煌往績紀錄，近排官媒發文話，房地產調控未夠全面，住建部會議提出不能讓樓市調控鬆綁念頭在市場上死灰復燃，吸引投機熱錢再次進場。

相信喺短期之內，內地三至五線城市，恐怕會陸續學埋一二線城市一樣，逐步升級擴大全國調控措施版圖。加上內地息口趨升，一八年內房股仲有冇咁好世界，把握反彈機會減磅為妙。

古勝