Market Insight：保留彈藥 咪手多多

眨吓眼，騰訊喺十幾個交易日內，由最高位439.6元碌到落366元，捧場客由天堂跌入地獄。最恐怖係跌到七個一皮，都只係將今年初起步至今的累積升幅，跌咗大約28%出去。

踩股王落350元誘因唔大

一隻市值曾經超逾4萬億元，港股歷史上前無古人的巨無霸，拖累港股短短兩個多星期，高低來回跌近兩千點，如果喺以前個市，已肯定係股災級跌市。

港股「成也騰訊，敗也騰訊」，今年單天保至尊帶住成個市衝上三萬點，只能套用有咁耐風流，有咁耐折墮的金句。今年成個市側晒落股王，十個基金十個over weight，個個以為坐得夠多，便輕鬆跑贏指數同行家。

點知人算不如天算，臨近年尾一開始計數，沽壓猶如滾雪球一樣，愈隊愈誇。家陣最多散字派關心跌夠未？從來騰訊講情緒唔講估值，近排散戶溝到心淡，牛證淨流入金額開始收斂，睇嚟大戶踩落350元誘因並唔係十分大。

美股後市未能睇透

一見跌市，利淡消息好似唔使錢一樣，如雪片飄來。又話驚港息追加，一陣又傳內地對南下基金審批放慢手腳，滬綜指也跌穿3,300點鐵底。不過，古勝最睇唔透係華爾街，若果唔係「侵侵」稅改過關，挾硬將上周五跌緊三百幾點的道指拗番上去，「通俄門」愈爆愈大鑊已經觸發咗一場小股災。

美股遙遙欲墜，萬一再跌穿24,000點關口，難保殺得性起的香港期指大戶，再下一城，有閒錢都無謂依家走去空手入白刃。

二三線股本來無乜特別，唯獨周一見忽然轉勇的網龍（00777），昨日大跌市都能升毫半子。春江水暖鴨先知，昨日公布首三季業績虧轉盈，賺3,087萬元人仔，去年同期則虧損1.08億元人仔。要留意，九月以每股25.4元批股後，網龍有跟唔到其他科網股的情況，期間眾安在綫（06060）、閱文集團（00772）熱爆登場都無乘機炒吓，會唔會批散咗舞唔上就不得而知。

新能源車好景持續

昨日手機相關設備股如現小股災，鴻騰（06088）跌8.4%、舜宇光學（02382）跌12.4%，丘鈦科技（01478）、比亞迪電子（00285）、瑞聲科技（02018）跌幅介乎6至8%，高位上車走遲半步都咪話唔頭痕！

今年相關設備股表現跑贏大市，兼且交投暢旺，成大戶套現目標不足為奇。不過，類似舜宇和瑞聲本身有研發能力和良好的業務基礎，短期股價調整又唔使過於悲觀，反正更好的股票，股價漲退總有時，平常心看待調整的到臨。

汽車股氣氛亦唔好得去邊，個股升得多時跌得也多，如吉利汽車（00175）急跌逾8%、廣汽集團（02238）跌逾9%、比亞迪（01211）跌穿65元關。大概係先前升得多的，如今跌幅就較深。

不過，明年四月起，汽車業將行雙積分制，傳統車廠變相被強迫要產銷一定比例的新能源汽車，當整體新能源汽車銷量有望按年遞增，餅愈做愈大，配套亦有望日益完善，故撇除短期市況波動，在下對於新能源汽車股前景的看法仍偏向正面。

古勝