印尼雅加達股市近年因為散戶比例唔夠，容易被外資所操控而苦惱。事關更高嘅散戶參與率可以令到市場更穩定，所以擁有百年歷史嘅印尼證券交易所就把心一橫，喺交易大堂搞流行音樂會同攝影比賽，藉此吸引俗稱千禧一代嘅90後年輕一族。
呢批90後，即係歸納入年齡21至30歲左右嘅年輕群體，印尼證交所講到明好希望佢哋可以參與股市。而官方數據顯示，與其他鄰國股市相比，印尼散戶參與股市程度較低，而年齡喺21至30歲之間嘅股民僅佔26%，但已經係所有年齡組別股民中佔比最大嘅一群。
幸好，印尼證交所嘅苦心初步反應正面，確實吸引到90後年輕大學生，回應有意將部分儲蓄用嚟炒股，謀取更高嘅回報咁話。講開又講，港交所係咪要向印尼證交所好好學習吓呢，小加哥，諗諗佢啦？
余絲韻