絲絲講場：港交所周年晚宴玩鑊「金」
踏入十二月，好多大公司都會舉行聯歡派對畀大家開心吓，香港交易所（00388）都唔例外，下周四就舉行周年晚宴。年年港交所派對都會大搞噱頭，今年主題係「Gold and Glitter」，即係金光閃閃。
為港英黃金期貨助興
點解今年會有呢個主題呢？起初絲絲諗爆頭都諗唔明，但心水清嘅朋友應該記得，今年港交所其中一件盛事係在香港同倫敦推出三隻「黃金寶貝」，即係港交所嘅人民幣及美元黃金期貨，以及倫敦金屬交易所（LME）嘅美元黃金期貨。為咗配合「兩地雙金」，所以今年派對大玩「黃金」主題，到時個個出席派對者都要着到「閃令令」，唔知行政總裁李小加今年會着乜配合主題呢？
睇番港交所過去嘅派對就玩過懷舊FEEL，個個着晒唐裝衫；有一年就玩美國牛仔主題；滬港通開車嗰年係「上海之夜」；前年主題最誇張，咪係「Superhero」（超級英雄）囉，個個要扮蝙蝠俠、超人、神奇女俠同美國隊長上身，行政總裁李小加每年都有意外驚喜給大家，斷估今年唔會令大家失望啩！
余絲韻