絲絲講場：丸龜買埋三哥 譚仔米線團圓
今年五月「譚仔雲南米線」（譚仔）畀經營「丸龜製麵」嘅日本公司東利多控股（Toridoll）傳以10億港元收購，半年後連「譚仔三哥米線」（譚仔三哥）都走唔甩！絲絲仲記得當時譚仔三哥老闆譚澤群（三哥）話，未有計劃與其他餐飲集團合作喎！
對準珠三角市場
據知東利多透過今次收購可搶佔香港七成嘅米線市場，最重要係有效配置公司資源，實現最大協同效應。公司今後首個發展目標會對準珠三角市場，再拓展至中國、東南亞及美國。完成收購後，東利多將擁有56間譚仔三哥同埋52間譚仔，共108間店舖。
對於譚仔三哥被收購嘅消息傳出後，代表譚仔三哥嘅公關就同絲絲講，三哥暫時對呢單收購無回應，不過遲啲可以安排同記者見面，到時再慢慢傾！
根據東利多透露，計埋日圓匯率變動在內，原來譚仔三哥截至今年三月底止，純利逾8,790萬港元，按年增長逾四成。同期收入7.89億港元，按年增兩成。
雖呢次交易未公布收購價，但之前東利多傳以10億港元買咗有50間分店嘅譚仔，絲絲估要收購有56間分店嘅譚仔三哥，最少都要差唔多10億港元啩。
經過今次收購，唔知譚仔同譚仔三哥，會唔會大團圓結局呢？
余絲韻