Market Insight：港鐵現價攻守皆宜

資金轉停泊高息股

反而，逆市靠穩的，有北水錄得淨流入的滙豐控股（00005），昨日高位見過77.4元，收報76.8元，升0.6%。似乎部分大戶還是選擇沽出部分累升甚巨的股份鎖定利潤，將資金停泊在估值相對穩陣的股份，類似大笨象呢類高息股成為資金流入的對象。不過，純睇圖表，若然股價未能突破80元，仍維持上落格局，炒作相關衍生工具要識上落車。

講到穩陣之選，古勝認為港鐵公司（00066）都係唔錯選擇。事關預期今年沒有任何港鐵物業發展獲發入伙紙及有利潤入帳，故現時股價較去年末季初才高約半成，嚟緊港鐵旗下黃竹坑站二期項目招標將於十二月一日截標，即係今年推出的發展項目僅3個，較原先計劃的8個大減。

由於樓價持續上升，港鐵惜推項目反而有利，若樓價持續高企，港鐵可因應情況，明年加快推售項目。加上沙中線等新鐵路線一九年陸續通車，相信未來業績會有一定爆發力，現價估值進可攻退可守，實力投資者可以認真考慮。

年尾「水緊」成常態

每逢挨年近晚，又到咗內地市場流動性趨緊的季節。內地銀行同業拆息趨升，加上中央政府不遺餘力打擊地下錢莊，唔多唔少會影響到兩地魚缸的「水源」。

跌市撈貨最好睇定啲

滬綜指昨日跌0.94%，收報3,322點，其中近期累積比較大升幅的半導體、5G、大型消費股等股份跌勢頗急，大戶沽貨套現似乎有迹可尋。想趁跌市撈貨，最好有點耐性，睇定啲再作部署，並適量減低持倉槓桿，以策萬全。

港股亦唔多精神，收報29,686點，跌180點，但主板成交仍過千億，有1,026億元。老實講，呢次升市，純由資金推動，但錢唔會不斷係咁嚟，水源稍停市況便出現回吐，係好正常。所以，只有洞悉到水源來去，才能捕捉到出貨入貨的最佳時間。

港交所長遠係贏家

至於如何洞悉水源去向？除咗係春江鴨之外，就只有勤做功課，多啲留意A股市況、內地證券研究報告同炒股網誌等的訊息。有卜架朋友話，近年已少睇外資券商報告，反而多睇內地券商報告，因更具參考性。魚缸向來係邊個有錢就邊個話事，可見如今港股話語權已回歸祖國的說法，確實非虛！

上周港交所（00388）股價升穿250元，古勝叫大家想買貨可以等一等回調先至行事，果然昨日股價以全日低位240.8元收市，跌2.5%。照計短線調整，238至240元水平會有承接，守得住的話，可以小小地買啲博反彈；但若然失守該水平，則暫宜觀望為妙。

不過，始終明年A股入摩，此前北水活躍於跨境部署兩地股市倉位，只要交投持續暢旺，港交所會係贏家。現價仍低於一五年大時代高位，照計中線280元冇失拖，只係有別於一五年的大上大落，今次升浪係反覆有序，長坐唔使過分憂慮短線波幅。

古勝