絲絲講場：鷹君羅老太賀壽要分兩場
鷹君集團（00041）羅氏家族嘅大家長羅杜莉君（羅老太）尋日牛一，絲絲祝佢老人家身壯力健、福壽安康。佢老人家尋日喺沙田麗豪酒店擺大壽晚宴，今次齊唔齊人？
羅老太希望維繫家族之間各人感情，又希望各人盡孝道，所以一早出晒邀請，叫齊所有仔女、孫同埋曾孫出席。
對立陣營下午已祝壽
聚會夜晚七點半正式開始，現場所見，四代人聚首一堂，最少都有成五六十人。結果是否齊人先？
尋晚佢哋影咗大壽晚宴大合照，羅老太當然盛裝出場，九兄弟姊妹當中，張相睇極都唔見有大女羅慧端以及第三至第五仔，即係於撤換家族基金信託人一事同媽媽對立嘅羅嘉瑞、羅康瑞、羅鷹瑞無出席壽宴喎。
不過咁，絲絲收到風，嘉瑞、康瑞、鷹瑞三家人其實尋日下午已經上過酒店房，帶埋生果禮物向羅老太斟茶祝壽。
乖孫斟茶逗利是氹番
至於一家人連賀壽都要分上下場，羅老太有冇唔開心？呢啲日子，絲絲點問得出口。不過見啲孫仔孫女、曾孫上前向佢斟茶逗利是時，佢都笑到見牙唔見眼，點都有番啲安慰啦。
余絲韻