鷹君集團（00041）創辦人之一羅杜莉君（羅老太）告滙豐國際信託（下稱信託人）一案，明年五月正式開審，不過依家可能會再生枝節。事關家族第六仔羅啟瑞嘅發言人同絲絲講，喺撤換信託人一事上同羅老太對立嘅嘉瑞（三仔）、康瑞（四仔）、鷹瑞（五仔）唔好欺人太甚，否則會行動升級咁話喎！
做乜咁嬲？聽講係同三阿哥嘉瑞近期頻頻增持鷹君，但羅老太就一直叫唔郁信託人幫佢增持有關囉。
不過，下星期其實大家都有一個和解機會o架，因為下星期係羅老太生日，將會喺二子羅旭瑞旗下酒店擺大壽。九十八歲兼四代同堂，幾咁難得，所以羅老太已經請晒家族內所有仔女連孫連曾孫出席同佢賀壽。唔知會否可以飯枱上傾得掂數，唔使打官司，和和氣氣呢可。
余絲韻