絲絲講場：威尼斯人十周年艾德森斷肋骨缺席
金沙中國（01928）旗下澳門威尼斯人開業十周年慶典可謂一波幾折，本來原定八月舉行，點知遇正颱風天鴿襲澳，造成當地傷亡及廣泛破壞，慶典梗要延期啦。
搭船來香港跌親
延期延到尋日（二十日）終於可以舉行慶典，邀請函寫明主席艾德森（Sheldon Adelson）同埋老婆瑪莉安會一齊做主禮嘉賓，點知出嚟主持嗰個係總裁王英偉！王英偉喺台上話，艾德森上周六受咗傷，有三條肋骨骨折，所以嚟唔到。
絲絲聽講，艾德森係由澳門搭船來香港時跌親，依家接受緊治療，望明年初再去澳門。要等到明年？唔通跌得好傷？
余絲韻