於十月中我曾撰寫過一篇文章，內容是關於提前買入先達國際物流（06123）來迎接「光棍節」的。因有太多人來問我，所以今次就同大家跟進這一件事。話說當日我的推介價是4.2元，結果股價於半個月內回落到4.07元水平，彈都唔彈，但又唔跌喎！梗係啦，這是我提及過的保底價，因圓通速遞（600233.SH）以4.0698元向股東提出要約，收購先達的所有權益。
近日有粉絲就問：「證券行寄信嚟問我受唔受喎，點算好？」我話：「乜你仲揸住？光棍節都過咗喇，你留返嚟煲醋咩！」佢話：「但……隻股未爆喎！」我答：「因憧憬而買入，因落空而沽出。要爆的一早爆咗啦！唔爆你點等都唔會爆！」
我想（以下一段話係事後孔明）股份於今浪唔爆是好合情理的。圓通大股東已持71%，全購幾乎是必然的，試問又有邊個會願意用4.0698元以上去買呢？
這個例子說明一個道理：於你買入一隻股之前，必先要心裏有數，知道自己係為咗乜，訂好止蝕同目標價，仲有deadline。假如結果turn out出來是不似預期的話，就要斬立決！
臨收筆前轉個話題，騰訊（00700）剛發布第三季業績，純利的增長beat晒大行的預期。我的大寶果然無令大家失望！接下來我們就一於煮重佢米，劍指450蚊！
富昌金融研究部總監 譚朗蔚（作者為註冊持牌人士，持有騰訊）