資訊發達，外圍指數走勢個個都識睇，可是環球股票大牛市，不同市場之間相關性甚低，參考價值不高，而且大忌是選擇性解讀，日經回千幾點叫做有燶味，但之前短時間暴升四千點就當睇唔到，戴這樣的濾鏡睇世界，神仙都救唔到。
騰訊（00700）業績交足功課，在明知恒指降低比重，未來兩個幾星期指數基金大把貨要沽的情況下，股價走勢已經算堅挺。核心持倉一定死守，暫時卻不會用騰訊主攻，留待接近月尾再吼機會。
這幾天當外圍調整，自己並沒有太大動作，只是任由組合價值捱打，暫時算是部署正確。能夠從容面對，第一是所揀的股票有交代，守得比大市好；第二是注碼不算太大，留有加注空間；第三是學會了不為組合一兩個巴仙的變動大驚小怪。
自己過去幾年是以對沖基金模式運作，對風險睇得好緊，是不會輸大錢，卻不容易贏得多。今年則主要以長倉基金模式迎戰，揀股票長坐，寧願斬倉減持也盡量不做對沖，效率才得以大大提升。要打倒昔日的自己當然不容易，其實是要摸着石頭過河，一步一步走，過程中一路贏到錢，自然棄暗投明。
豐盛金融資產管理董事 黃國英（作者為註冊持牌人士，基金持有騰訊）