騰訊控股（00700）單天保至尊，支撐港股昨日拗腰返回兩萬九點，10日線失而復得，在美股轉弱之下，騰訊發揮定海神針的作用。不過，成個市側埋一邊，其他二三線股無厘氣氛。
恒指升167點報29,018點，單係騰訊同中國平安保險（02318）兩隻股票貢獻恒指144點，佔指數升幅八成六。整體大市跌多過升，新股客磨拳擦掌迎三寶尾關，易鑫（02858）卻搞到通地眼鏡碎，開10元跟手做樣掃到去10.18元後，轉過頭經已壓返落9元樓下，以貼近低位8.12元收市，比招股價7.7元只有5.5%進帳。頭槌同埋大飛如果未埋單計數，連利息、使費經已無肉食。睇嚟經歷雷蛇（01337）同易鑫，買嚟賣的新股遊戲係時候歇一歇。
投行生意難做，尤其十間行十間唱好的騰訊，分析員要突圍搶收視，一係學似瑞銀，唔等出業績，報告搶先登場，博中固然威威，睇錯至多潛水當無事發生。再唔係將目標價有咁高唱咁高，吸引buy side芬佬注目，至少都肯朝早聽個電話，甚至接個Call，睇吓有咩真知灼見睇到咁牛。
早兩日瑞銀睇450元，缸邊客經已嘩嘩聲，但貶吓眼紀錄被其他行家超越。昨日一堆報告，滙豐睇454元，野村睇458元，CLSA睇460元，大和睇480元，但都唔夠花旗咁牛，目標價由392元調高到482元，最牛睇606元。以一九年35倍PE，值唔值見仁見智，依家資金都圍晒落去幾隻重磅股度炒，唔跟風堅持等運到咩！坐住冇鑊氣股仔在升市期間，機會成本一樣唔輕。
十月出季績後，靜過一排的中興通訊（00763），昨日試完20日線後拗腰高收，升1.1元報28.8元。之前都提過5G概念中，最四平八穩係中興，業績最壞時刻已過，首三季賺39億元人仔，按年升36.5%，明年開始內地電訊商進入5G固定投資高增長期，中興可睇高一線。上月股價見31.1元新高後，曾低見23.85元，近排守住50日線慢火煎魚上升，有機會再攻頂，短期要睇番佢。
古勝