絲絲講場：近五成高管憂被AI取代

AI入主辦公室，打工仔最擔心係份工仲保唔保得住。報告就引述一項研究指，有46%企業管理人員認為，嚟緊五年內，自己份工可能會被AI取代。

有軟技術先留得低

不過，專家睇法相對樂觀，雖然AI可處理部分工序，但擁有軟技術嘅人才同樣渴市。專家話人類嘅溝通、合作、批判性思維與人際關係能力，對企業發展好重要，擁有呢啲技能就唔會被淘汰。

雖然唔會被淘汰，但十年後，閣下份工隨時變做合約制。研究指，未來聘請合約制員工模式，將由現時針對較低技術嘅工種，逐步擴展至較專門嘅網站設計師、市場營銷、金融、法律等，甚至會出現兼職CEO、兼職首席營銷官咁，事關「共享勞動力」係大勢所趨。

報告仲預示埋未來十年嘅Office會係點。從事廣告或創意設計嘅，會戴埋AR（擴增實境）眼鏡返工，事關要用來睇為客戶設計嘅廣告同埋其他內容。

部分公司就會喺員工制服上裝無線感應器，監測喺危險場所工作嘅員工，留意住佢哋嘅健康指標。絲絲諗，到時公司何止關心你嘅健康……

余絲韻