絲絲講場：新交所終於有飯開啦！

話說，新交所於一一年八月取消午休時段，但佢哋經過諮詢後從善如流，由尋日起恢復午休時段，由中午十二點至下午一點，放飯去也，同香港睇齊！

雖然只係得一個鐘，比以前嘅兩個鐘少，但當地約3,000名股票經紀總算再有番餐安樂茶飯食，佢哋亦可以透過食晏晝飯，加強同客戶嘅關係，相信當地唔少嘅高級餐廳亦受惠。

新交所當年取消午休，原意係想谷起交投，但就搞到業界怨聲載道，成效亦備受質疑。交易平台Instinet執行董事Patrick Mohr就統計過，過去20個交易日，中午十二點至下午一點時段，交易額僅佔全日5.5%，係全日交投最淡靜嘅時段。

交易7個鐘仍冠亞太

雖然歐美主要股市都無放午飯時間，但呢個傳統喺亞洲依然係好普遍，馬來西亞、菲律賓同內地嘅經紀都有一個半鐘食晏；至於泰國最嘆，可以食足兩粒鐘！

若果淨計交易時間，新加坡即使恢復食晏時段，每日交易時間仍然長達七個鐘，冠絕亞太區！較上海嘅四個鐘多近一倍，亦多過香港嘅五個半鐘。

余絲韻