絲絲講場：羅傑斯：兒女唔係債！
「商品大王」羅傑斯尋日出席一個「一帶一路」論壇，開場先講自己九九至○一年揸車環遊世界，返到紐約休息之後就喺六十歲初嘗做爸爸嘅滋味，跟住話湊女好開心，更加講笑咁叫在場人士如果仲未有小朋友嘅，快啲「返屋企搞掂佢」！
羅傑斯話，後生時覺得養細路「嘥時間、嘥精力、嘥金錢」，誓神劈願自己唔會搞啲咁嘅嘢，不過今日佢坦言錯到貼地，兩個女帶畀佢好多歡樂。
近期增持中資股
講番財經，羅傑斯透露最近增持咗中資股，笑笑口話「上個禮拜都有，依家證明我啱（口架）啦！」增持嘅都關乎北京強調嘅嘢，例如整治空氣污染、「一帶一路」、醫療保健，又話「咪沽人仔呀！你沽咗，我食完餐晏就買！」
佢估計今年唔會爆發金融危機，但五年內會，而且「非常大鑊」，因為全球債台高築，又話美國喺金融海嘯後印咗大量銀紙冇用，卻成為世界歷史上負債最嚴重嘅國家，利率上升，代價將會非常沉重，直言美元絕非避險天堂。
余絲韻