絲絲講場：將升任副總裁金管李達志上位

戴敏娜做足22年退休

查實係一五年已經出咗通告話Howard會接替已經退休嘅副總裁彭醒棠，為鋪靚條路，Howard舊年已升做高級助理總裁。數數手指，即係兩年紮職兩次，究竟有幾多人做得到？

其實彭醒棠舊年退休後，金管局高層管理人員架構有所調整，由三個副總裁縮到兩個，嚟緊終於重返「三人行」喇！

仲有一個令絲絲震驚嘅消息，就係金管局助理總裁（法規及打擊清洗黑錢）戴敏娜（Meena）仲有一個月就退休！喺金管局做咗廿二年，Meena真係Keep得非常好，絲絲完全睇唔出佢已到退休年齡。

現任助理總裁（銀行操守）朱立翹會頂Meena個位，而現任主管（銀行監理）區毓麟則替任朱立翹。

另外，金管局有筍工啱一班大學生，佢哋近排搞咗個先導人才培訓計劃招聘日，有800幾個同學仔參加，被選中嘅實習同學要喺兩個暑假分別進行八星期在職培訓，完成計劃後，就有份私人銀行工作等緊畢業後返工，最最最吸引係實習期間仲有唔少於一萬蚊嘅月薪，筍！

余絲韻