周三同大家講，個市目前係牛幾我唔知，淨係知新股市場肯定係牛三，事關我於食飯時間行過大街小巷，甚至坐喺公司對面茶餐廳食餐蛋麵嗰時，老闆娘見到個熟客第一句唔係問「食咩呀？」而係問「抽唔抽得中閱文（00772）呀？」賺到一皮的就笑騎騎，賺唔到一皮的就話：「早知我孖（孖展）多啲啦！」然後隔籬嗰個就話：「有早知就無乞衣啦！」
Anyway，我真係覺得個煲未爆，事關牛三都只是剛剛先開始。我周三出文，當日個市就已經出現了一個牛三的徵兆了：閱文上市，帶動港股於上午的總成交高達812億元！係平日全日成交來哦！
我在想，一隻騰訊（00700），一隻閱文，兩股加埋已經有313億元成交，如果這個情況一直維持落去，以後還邊有一日800億、900億成交這支歌仔唱呀？大佬其他啲股份唔使食咩！所以話，我極有理由懷疑及相信每日閒閒哋過千億成交已經成為了新常態，而受惠呢種常態最深的股份應該係港交所（00388），除非唔係。
港交所自從「fake news」嗰日後，我已經無再睇佢，但佢近日爬吓爬吓，爬返上十月十六日的225.6元收市位，向上就只有230.6元這個阻力。突破埋的話，有人就話黃金比率可以睇250元，我就話重倉阻力已經要去到280元喇！
富昌金融研究部總監 譚朗蔚（作者為註冊持牌人士，持有騰訊及閱文）