絲絲講場：以太幣23歲創辦人：虛擬幣似巫毒經濟

講到今年升到你唔信嘅市場，不得不提虛擬貨幣，當中比特幣（Bitcoin）今年以來不斷被人估計就快見頂，但到今時今日，比特幣已經升咗七倍，尋日比特幣宣布延遲更新系統，比特幣即時升到7,885美元高位，令唔少傳統金融機構分析員大跌眼鏡。

不過，虛擬貨幣升勢太勁，癲到連以太幣（Ethereum）創辦人，年僅23歲嘅Vitalik Buterin都話，依家個勢有少少似巫毒經濟（Voodoo Economics）。巫毒經濟學本身係指以擴張赤字（即係使大佢）嚟預支國家經濟，唔止不切實際，仲不能自拔。

換言之，作為行內人嘅Buterin都覺得虛擬貨幣升得有少少唔理性，佢話市面上好多虛擬貨幣嘅價值背後都冇實質支撐，情況相當詭異，認為部分虛擬貨幣好難長遠運作。

絲絲明白，喺虛擬貨幣勁升嘅情況之下，好多人都會當唱淡嘅觀點係耳邊風。不過留意番，Buterin當年唔夠20歲已經創造現時市值第二大嘅以太幣，佢嘅觀點有一定參考價值。

以太幣最新市值已逾300億美元，價格升到315美元，年初至今累升咗差唔多36倍！而相較比特幣有2,100萬枚嘅發行上限，以太幣嘅發行係無限嘅，所以以太幣唔能夠用代幣嘅稀有性去支持價格，Buterin就透露，研究緊推出獎勵制度，鼓勵以太幣持有人將部分以太幣凍結，減少市面嘅流通量，以支持以太幣價格。

余絲韻