Market Insight:汽車股或再度撻着

內地四大車展之一的廣州國際汽車展將於十七日開幕,各大海內外車廠均把握機會展示新車款,其中寶馬將展示一款全球首發車型、三款內地首發車型,其他車廠亦有多個新款SUV,所以唔單只消費者會留意,各大車廠亦會高度關注,以達知己知彼。

個別汽車股昨日有異動,其中廣汽集團(02238)一度高見20.45元,華晨中國(01114)曾高見21.4元,比亞迪(01211)曾高見73.55元,相信未來一周汽車股仍有條件踩油上,不妨留意短炒機會。

比亞迪有貨坐定定

吉利汽車(00175)十月份總銷量達12.51萬輛,按年增約三成,按月增約一成半,表現維持強勢,惟見昨股價反反覆覆,畢竟現水平估值唔可以話係平,值博率一般,如果手上冇貨,即使短炒宜等落番25元樓下先至諗,支持位23.5元不宜有失。至於古勝首選的新能源車股比亞迪,明年業務將現爆發式增長,股價走勢對辦,有貨可以坐定定。

至於季度銷售遜預期,搞到股價由先前高位12元反覆回落至昨低位見9.17元的長城汽車(02333),現價與250日線8.98元不太遠,勇者不妨留意未來一周汽車板塊氣氛,捕捉博反彈機會,但始終其銷售數據有待改善,反彈唔睇得太高,初步睇10元阻力甚大,穿8.9元止蝕。

港股升勢極度集中

閱文集團(00772)一掛牌股價起個孖,抽到的固然笑逐眼開,可是騰訊(00700)的母憑子貴的故事,亦都趁好消息出盡暫告一段落,四舊水升唔穿,收市倒插,資金分流,睇情況要等埋易鑫集團(02858)掛牌先至癲過。

港股低位連挾兩日,昨日在凍資王閱文正式登場,個市趁短期利好消息出盡嚟個調整,恒指掂一掂29,123點今浪新高後,尾市縮番落28,907點收,跌86點。

睇住中概科網公司一隻一隻取道美國上市,難怪港交所(00388)恨到流晒口水,急住想改例。當日唔接受阿里巴巴,依家人哋喺花旗日日閒閒哋有成兩、三百億港銀成交,已經覆水難收。昨日騰訊同閱文兩母子合共313億元成交,佔咗1,387億元成交五分之一有凸,珠玉在前,嚟緊隻易鑫超購倍數都肯定唔嘢少。

個市算唔算雞犬皆升?如果撇除騰訊兩母子,同埋三幾隻北水熱炒股,其實八成幾股票仲係未見氣氛。唔信?睇番恒指重返港股大時代高位28,588點樓上,港交所仍然拉牛上樹,同一五年高位298.65元有大段距離可見一二。

散戶高追閱文可免則免

睇見大量的一手上板,閱文小股東相信唔少都掟晒出街,仲玩唔玩得過先係最多人想知的問題。今次閱文上市,一手中籤率7.7%,估計仲難過首日經IR訂到iPhone X!孖展客唔入飛超過100手以上,叻到盡都只係攞到1手,基金配售部分一樣畀乞兒咁,同保薦行無緊密關係的,攞零幾乎係必然結局。

芬佬冇辦法唔跟

騰訊坐大,佔恒指比重早在一成樓上,唔少港股基金修改章程,放寬單一股票持股超越一成之限制。不過,投資法則第一條,唔好將所有雞蛋放入同一個籃度,即使閱文估值好貴(半年賺得2.1億元人仔的公司,市值928億元,PE無乜意思),但至少畀芬佬一個分散投資的藉口,故昨日炒高一倍,基金一樣無手軟追貨。

大家如果都坐滿騰訊贏緊大鑊,當然唔阻你發達,若從投資角度出發,在下諗唔到一個自己都信的理由,叫大家過百蚊都去追。

古勝