孖妹S檔案：單身巴絲打 點投資至盈？
喺每年雙十一「光棍節」，孖妹梗有藉口血拼，一係就話單身寂寞，要去瘋狂任性吓，一係就話「脫單」要裝身慶祝。不過，孖妹最近發現屋企原來有好多新衫未着過，真係覺得要停一停手。其實，買落一大堆未着過嘅衫得個擺字，又唔打算放上網賣番出去嘅話，只係一個燒錢動作，冇咩回報可言，唔多理智。因此，如果你係單身一族，不如等孖妹陪你一齊計劃將來，做啲更實際嘅投資部署仲明智喇。
初級部署 宜打穩陣波 買ETF及保險
謝：高富金融集團常務董事 謝禮健
黃：利嘉閣按揭代理董事總經理 黃詠欣
彩兒：如果你我的青春終會有盡頭，請跟我盡快夢裏遨遊……
Kitty：誰知得失意義，誰管吉凶預言……
謝：冇人知將來點，可能你「脫單」呢？不過唔理將來有冇膊頭畀你依靠，養成理財習慣就唔使騰雞。
祝大家雙十一快樂！單身喺理財上有優勢，自己賺自己使，賺得多就使多啲，賺得少就食少兩碗飯。
彩兒：你會建議單身人投資咩？係咪買啲較高風險嘅投資產品都得，反正衰咗都淨係同自己負責。
積金揀股考慮新興市場
謝：要投資高風險嘅嘢，要有時間鑽研至得。我會建議買環球股票ETF（交易所買賣基金），以分散風險，同時捕捉環球股市升勢。若想揀個股，可諗吓高息股，就算滙豐控股（00005），撇除佢股價波動，單係收息都唔錯。
彩兒：我哋份強積金亦要揀股，有咩建議？
謝：你哋後生可以進取啲，如投資新興亞洲市場，隨住國家經濟起飛，投資回報會增加。記住轉強積金投資組合要有目的，唔好冇嘢搵嘢做。
與家人同住 儲錢有效率
Kitty：單靠強積金應唔夠退休，買股票難預測回報，單身一族可以點儲錢？
黃：單身最好同家人住，食屋企、住屋企慳好多。
謝：先買住院入息保險，保障住院期間醫療費用賠償，咁你到時唔使手停口停。另外，亦可諗諗買分紅保險產品，會定名非保證每年紅利同終期紅利，投保年期又唔會太長，幾有彈性。
Kitty：咁計落，幾時先達到財務自由啊？
謝：唔好畀自己太大壓力，與其定置富為目標，不如搵人生目標，若你覺得知識就是財富，不妨去進修。
進階策略 首次置業自住投資俱佳
彩兒：好多人話買樓最實際，但樓市升咗咁多，單身一族應唔應該入市？
謝：好難Time the market，因此我覺得有自住需要，有財政能力，就應該買。
黃：香港始終地少人多，買第一層樓可以用嚟自住或投資，係唔會輸！當然都要自己計掂數。前排銀行同業拆息（Hibor）突然上升，供樓人士就嘗到加息滋味。
Kitty：每月唔經唔覺要供多幾百蚊，若Hibor再升，真係要日日留喺屋企做單身宅女。
做高成數按揭 留意風險
黃：供樓係好大Commitment，供款期一般要20至30年，且樓市係有升跌周期，一旦樓價跌得勁，資不抵債，隨時變負資產。單身人士做高成數按揭時，要留意投資風險。
單身嘅好處，就係一個細細哋逾二百呎單位都夠住，而近期市場上細單位數目的確氾濫。另外，細單位入場費較平，可以做到高成數按揭，對單身人士來講係個好消息。
例如土瓜灣一個舊樓，實用面積三百幾呎，樓價400萬元以內，係一個唔錯嘅選擇。再者，土瓜灣即將開通鐵路，單位離鐵路嘅步程僅10分鐘，周圍交通配套完善，亦近何文田校網，係理想居住地點。
投資觸覺 「獨」男交易密 回報遜宅女
Odean：加州大學柏克萊分校Hass商學院教授 Terrance Odean
Kitty：教授，你有冇研究單身人士同結咗婚嘅投資者，佢哋有咩唔同嘅投資習慣？
Odean：梗係有喇！我仲做咗個詳細調查添，結論係，單身冇另一半嘅束縛，啲錢想點用都得，普遍會Trade得密過結咗婚嘅。
調查另一結論係，Trade得愈多，投資回報反而愈低。所以，單身男與單身女嘅投資回報差距，會比夫妻之間嘅大。單身男仔嘅股票交易次數比單身女仔多67%，每年投資回報亦比單身女仔少1.44%。
彩兒：講得好！所以男仔要特別珍惜另一半，女仔間接幫你賺錢。
Odean：點都好喇，投資回報多與少，唔應該係你選擇單身定結婚嘅主要考慮因素。
實時資訊令女仔有信心
Kitty：其實男仔定女仔炒股勁啲？
Odean：心理學嘅調查發現，男仔比女仔更有自信，特別係對愈有挑戰性嘅工作，就愈顯得有自信。例如買賣股票，要跑贏大市，係有難度，普遍男仔就會覺得自己嘅投資分析技術比一般人叻，會高估咗預期投資回報，令預期同實際回報出現較大落差。
Kitty：好嘢，我係女仔！
Odean：一家美國證券行嘅數據顯示，男仔Trade得頻密好多，投資交易量係女性嘅1.5倍，但愈Trade得多，投資回報就愈低，所以男仔嘅投資表現普遍差過女仔。
Kitty：估唔到Shopaholic（購物狂）嘅女仔，喺股場上都咁忍得手！
彩兒：傻嘅咩，邊有你份。再者，自信啲嘅女仔，或者投資仲勁啲呢！
Odean：若投資有明確嘅對錯，同埋提供實時資訊，女仔嘅投資信心唔會差過男仔。惟股票市場有太多未知數，要投資者估估吓，所以一般女仔喺股票投資上表現得冇咁自信。
男仔太自信 偏向高風險
Kitty：就如女仔跳槽或升職，都會慎重考慮，衡量能唔能夠勝任新工作，通常要有十足把握先至肯試。相反，男仔多數唔理咁多，跳咗先算！
Odean：過分自信會累事。理性嘅投資者會衡量自己可以承受嘅投資風險，計算投資成本與回報後再入市，不過，唔少男仔因為過分自信，持有風險過高嘅資產配置，例如男仔一般會買多啲細價股。
彩兒：過分自信嘅男仔，喺投資方面會有幾撞板？
Odean：歸咎於男仔Trade嘅次數較女仔多出近半，令到男仔最終嘅投資回報減少。仲搞笑嘅就係，我發現，個別投資者如果不斷咁轉換組合，新買入嘅股票表現會差過新沽出嘅股票，Timing錯晒。
芬佬未必叻 或夾硬入市
Kitty：即係話，唔少過分自信，Trade得過多嘅投資者未做夠功課就衝動入市，明知衰都要舂個頭埋去。
Odean：都可以咁講。值得一提，雖然管理主動基金嘅基金經理比一般散戶專業，但未必時時都咁叻，唔排除有時係夾硬入市，因為有交易，先會畀客人感覺冇偷懶，就算收番較昂貴嘅管理費都似合理啲。
彩兒：男仔Trade得多，但若計番男女個人股票組合嘅平均投資金額，男仔係咪都買得多啲？
Odean：Smart！
Kitty、彩兒