Market Insight：手遊股借電競短炒

美國十月份非農就業職位新增達26.1萬個，即使稍低於市場預期的31萬個，增幅卻是逾一年來最勁，失業率為4.1%。毫無疑問，美國已達全民就業標準，嚟緊十二月加息四分之一厘應該是基本消費。利率期貨顯示，十二月加息0.25厘機會達96.7%，另外3.3%更估加幅唔止咁少，可能一口氣去到0.5厘加幅。數據公布後，摩根大通將明年加息次數的預測，由3次加到4次，以反映勞動力市場的緊張。

時代已經唔同，以前成日鬧細路掛住打機唔讀書會無出息，依家打機打到做網紅、搵真銀，代表國家出戰亞運會，「電競」成為資本市場趨之若鶩的新主題。雖然閱文集團（00772）5,200億元凍結資金未回籠，影響孖展客調動，外面傳今日截飛的雷蛇（01337），單計證券行借出孖展，近百倍超購應無懸念。

大摩啱啱將騰訊目標價由370元，調高至420元，主因係王牌遊戲《王者榮耀》帶動手遊業務，估計第三季收入勁升七成二創新高，邊個仲敢話打機無「錢途」！

IGG利好因素未反映

電競熱席捲全城，反而幾隻遊戲股好似老僧入定，IGG（00799）、博雅互動（00434）及雲遊控股（00484）近排無厘鑊氣，往績市盈率9倍，三隻之中最低的博雅，與主打德洲撲克一類的長青遊戲，業績爆發力較遜有關。雲遊業績能見度低，上半年蝕緊1,770萬元人仔，也是較賭大錢的遊戲股。

主打遊戲大有錢途

反而IGG在新遊戲《王國紀元》大賣帶動，上半年業績已升1.94倍，由管理層對新遊戲周期的預測極為樂觀，估計可以維續四至五年，也估計《王國紀元》的月流水（每月營業額）可以由十月的5,000萬美元，升至明年的目標8,000萬美元，看來利好因素未完全在今年三至七月升浪中反映出來。

IGG股價由高位13.95元，累積回落兩成七，近個多月密密回購，股價落到10元邊似乎管理層都開始覺得差唔多，趁電競故事當旺，博短期彈番去12元樓上，以九月低位9.65元作止蝕，以小博大可以一試。

「哎瘋」炒燶 寧博瑞聲

港股高位愈玩愈窄幅，上周更多人關心，是iPhone X正式派街後，果農的收穫如何。今次蘋果公司似乎刻意要整死「哎瘋」炒家，明知你買嚟賣畀內地客，香港官網十幾分鐘售罄，反觀內地官網卻長賣長有，無咗北方大客高價搶貨，iPhone X炒唔起，炒家嘥心機捱眼瞓，執幾舊水得啖笑。

股神確係唔簡單

不過，蘋果公司第四季業績唔嘢少，並無受iPhone 8削減生產訂單傳聞影響，業績遠勝預期，收入及盈利都錄得雙位數增長，連大中華區銷售都見回勇，成績表靚到絕，刺激市值首次突破9,000億美元。

同日股神巴菲特投資旗艦巴郡公布持倉狀況，第三季大手增持過蘋果公司股票，持貨價值由去年底71億美元升至213億美元。股神八十有七，仲能夠今天的我打倒昨天的我，由唔識唔沾手，到一下定主意嚟個瞓身，確係唔簡單。

今季蘋果公司季績仲未反映iPhone X銷情，而上周五因為績前隊咗落嚟的瑞聲科技（02018）睇嚟今日有機會又再癲過，不妨留意。

古勝