絲絲講場：Tesla馬斯克瞓工廠催谷新車
電動車生產商特斯拉汽車（Tesla）馬斯克（Elon Musk）堂堂一個500億美元市值上市公司嘅行政總裁，原來公司裏頭佢連固定嘅寫字枱都冇張，而且喺工廠過夜仲要瞓地下添！
站在前線 寫字枱跟身
話說Tesla剛公布第三季業績係歷來蝕得最甘，拖累股價急挫，唔通馬斯克罰自己加班？工作做唔晒就瞓地下？唔係！原來係因為佢嘅寫字枱係「流動」嘅，跟隨住佢去邊度做嘢就會出現：「或準確啲講，我冇自己一張寫字枱，當我見到公司邊度出問題，我就會把自己『移去』出問題嘅地方，因我認為領導應該站喺前線。」馬斯克係咁樣同外媒解畫嘅。
依家Tesla面對緊新車Model 3的生產問題，所以馬斯克嘅臨時寫字樓同寫字枱就喺Model 3的生產工廠之內。佢喺廠內唔單只做嘢，仲忙到要喺地上瞓過夜，亦因為咁樣，佢最近仲凍親，搞到感冒添！
余絲韻