絲絲講場：騰訊卸妝App撼美圖秀秀
被譽為神級App嘅「美圖秀秀」，令到萬千女生重拾自信。不過，一個由騰訊控股（00700）開發嘅AI（人工智能）開放平台，騰訊優圖所研發嘅App「騰訊優圖一鍵卸妝」未上架已迅速爆紅，原來佢最大嘅亮點就係將女生嘅美顏相還原，女生嘅真面目即時原形畢露！
靠AI算法還原真貌
現在市面上各種美顏、瘦臉、加濾鏡嘅P圖軟件五花八門，女生可謂愛不釋手。男生經常遇到嘅經歷就係當事人站喺你面前，但認唔出，因為本人同照片上根本就係兩個人。如今AI算法幫到大家，喺剛結束嘅國際計算機視覺大會（ICCV）會上，騰訊優圖（TENCENT YOUTU LAB）團隊帶來「一鍵卸妝」技術，還原美顏真面目。團隊研發出AI卸妝效果算法，而且算法本身已經成熟，實際嘅App即將會喺Android平台和電腦介面供大家下載。
新聞一出，內地網民笑言，已經幫騰訊優圖團隊呢個App諗咗個名叫「醜圖秀秀」，即時獲網民一呼萬應。
講番騰訊優圖，本身係一個人工智能技術開放平台，專注圖像處理，模式識別和深度學習。並且喺人臉檢測，五官定位、人臉識別等領域都積累唔少完整解決方案！今次呢個App可以話係小試牛刀咋！
余絲韻