絲絲講場：喬布斯愛車值幾錢？
出名追求完美到幾乎冇人性嘅Apple Inc.已故前教主喬布斯會揀咩車？原來係架配黑皮內籠嘅鈦銀色寶馬Z8！呢架教主生前座駕下月會公開拍賣，預計成交價會去到40萬美元（約312萬港元）。
架車○○年出廠，喬布斯喺同年買，喺啲加州登記文件上，佢甚至用實名同佢個人住址登記，向來乜都搵方法隱名嘅佢，好少咁做。不過最搞鬼係，隨車仲跟埋一個寶馬標誌嘅原廠Motorola摺龜，睇怕係喬布斯擁有過嘅嘢當中，佢最憎嘅其中一件！
聽講當年係甲骨文公司CEO埃利森說喬布斯買，話寶馬Z8係現代汽車工程與人體工學嘅典範，襯晒佢喎。
睇番，喬布斯買呢輛車嘅○○年，正正係佢強勢回歸Apple後正式坐番正個CEO位嗰年。佢揸咗架車三年幾，○三年賣走，嗰年佢被診斷患癌。呢輛車明顯陪佢走過人生好重要嘅高低。
余絲韻