絲絲講場：股市雖旺 輪王于正人急流勇退
雖然近排港股轉旺，窩輪及牛熊證市場都好似有啲起色，但正正呢個時候，瑞銀亞洲股票衍生產品銷售部董事總經理于正人（Johnny）返埋今日就開始放Garden Leave（離職前嘅有薪假期），離開輪場。佢話：「加入咗瑞銀十三年，做咗十二年輪證工作，依家想休息吓先，十一月中會同太太飛去日本玩。」
無意轉投其他發行商
Johnny畢業後只打過三份工，包括喺英國做咗三年多嘅會計工作、加入過瑞信英國工作六年，之後就喺瑞銀做咗長達十三年。佢喺香港輪場嘅資歷稱得上係數一數二。
佢話離職之事早喺幾個月前已決定，已逐步安排同事接手其工作。之後該行董事卓素華（Winni）等三名同事仍會繼續同大家見面。Johnny亦強調，呢一刻冇計劃加入其他發行商，即使獵頭公司搵過佢，佢亦冇理到。
依家輪場無復當年勇？豐盛金融資產管理董事黃國英就話，依家發行商之間競爭大，加上港股低波幅、低成交，難炒！
「投資者買輪嘅話，引伸波幅跌跌不休已經輸到暈；買牛熊證嘅話，每次食雞胡賺少少，然後突然輸鋪十三么，已經輸凸。」黃國英仲話，「依家留低喺輪證市場嘅，都係高手！相比十年前，近年少咗新血加入，都對發行商生意有影響。」
余絲韻