Market Insight：儲足彈藥迎新股熱浪

上星期五美國科技龍頭因為季績勝預期，股價升到爆廠，其中亞馬遜股價一口氣升穿1,000及1,100美元兩個整數大位，創辦人貝索斯身家超越微軟精神領袖蓋茨，進身世界首富。成個科技板塊炒到出煙？連美國上市的阿里巴巴都連挾幾日。

反觀香港，股王騰訊控股（00700）本周初一連兩日開高畀沽盤壓到實一實，到昨日終於見真章，一升就十皮，見過360.4元的歷史新高，也是升市重要功臣。

騰訊親生仔閱文集團（00772）街外傳話凍結資金高達5,200億元，以1,513萬股IPO股份，上限55元定價，超購將會達625倍。啟動回撥，將IPO部分追加到總發行新股的33%，即係4,995萬股，仲係超購189倍，以街外傳近40萬認購申請，恐怕都幾難一人一手。

計番孖展息大概1.3至1.4厘，估計大飛客每股利息成本約3元，以閱文未上市股市先興奮的氣勢，就算分得唔多，斷估上市點都有肉食。閱文下周二先退票，另一新經濟股雷蛇（01337）周一中午截飛，仲有一大堆新股排住隊招股，想話一注本錢玩幾瓣的孖展客，今次算盤恐怕打唔響。

恒大或藉數據炒一轉

喺收市後，中國恒大（03333）公布十月份合約銷售563億元人仔，按年勁升55.8%，今年首十個月累計合約銷售，升至4,223億元人仔，已達到全年目標4,500億元人仔的93.8%，睇怕超額完成機會相當大。

比亞迪唔怕坐

今年內地「金九銀十」傳統賣樓旺季氣氛一般，恒大兩個月卻賣過千億元樓，都算誇張。近排內房股無鑊氣，恒大縮返落30元樓下，會唔會趁數據炒番兩日，今朝早要睇實。

早兩日提及過的比亞迪股份（01211），已連彈兩日，昨日上過70.95元，收報68.95元，升0.8%。古勝都係嗰句，中長線唔怕坐。公司剛公布與深圳佛吉亞汽車部組合營，發展汽車零部件業務，包括座椅產品。在下相信，大趨勢的發展係，比亞迪會向其他車企供應汽車零件及電池等，以鞏固在新能源車市場的龍頭地位。

中芯回饋長情股東

呢期半導體股氣氛向好，中芯國際（00981）股價昨日再創52周新高，高見13元，收報12.98元，升8.5%。中芯自○四年掛牌以來，老實講應該冇咩長情股東贏到錢，皆因上市後股價反覆向下，○九年起轉在低位橫行，直至管理層大換血，才見到轉機。

大成交突破阻力

睇番該股於一六年十二月進行過十合一，終於由毫子股變成蚊股，加上業績漸見起色，股價重展活力。於十月中旬，中芯有高層人事調動，市場普遍認為新安排有助加快公司前瞻性發展，股價亦見持續好轉。

中芯於九月底自7元水平回升，十月中旬在10元水平整固過後，又再起步，昨日為第四支陽燭，成交放量，強勢畢現。

從周線圖可見，12元關都算係一個重大阻力位，如今能夠以大成交突破頗具意義，相信此股長期升浪才剛剛開始，想加注就要把握時機，期望長情股東早日見收成。

古勝