絲絲講場：信置喜事重重 黃志祥抱孫派利是

大仔升副主席

黃志祥嘅次子黃永龍（David）同太太Joey喺尋日喜獲麟兒，恭喜晒！如果以集團僱用約7,140名全職員工計算，今次就派咗142.8萬元。金額多少冇所謂啦，最緊要大家開心。不過聽講唔係即時袋落袋，而係透過銀行於今個月內過數。

至於信置第二件喜事，就係黃志祥嘅大仔、現任執行董事黃永光（Daryl）獲委任為信置副主席，尋日生效。Daryl同時亦獲委任為尖沙咀置業（00247）及信和酒店（01221）嘅副主席。呢個安排應該都係為新加坡黃氏家族第三代接棒做準備嘞。

Daryl喺信置嘅年薪連同其他福利將約為93.29萬元，董事袍金每年3萬元，並可收取按表現發放嘅花紅；至於佢喺尖沙咀置業及信和酒店嘅董事袍金將分別係每年3萬及2.6萬元。

Daryl透過公關同大家講，對於被委任深感榮幸，佢期待同各董事、同事、持份者繼續合作，提升卓越服務及品質，致力為股東增值咁話。其實Daryl自二○○五年四月出任執行董事以來，面對傳媒講嘢一向都穩陣，希望佢哋業務都穩步上揚啦。

余絲韻