港股乏力已是路人皆見，回看十月第一個交易日，恒指收28,173點，最後一個交易日收28,245點，相差不足百點，港股在十月中下旬猶如泥漿摔角一樣，對期指及衍生工具炒家真係要少做少錯，可以偷位的空間十分狹窄。
月結日，以為港股好大機會高開低收，指數由早市最多跌152點，由低位28,183點逐步收復失地，尾市最多倒升17點去到28,354點，惟收市的U盤時段恒指被嘜低90點，收報28,245點，國指跌55點報11,507點，主板成交962億元。
大市技術走勢上，未擺脫拉牛上樹的上落市悶局，繼續壓在經已纏繞一起，破位意義唔大的10日及20日線樓下。
目前期指炒家可做的就只有忍，一係等指數跌到50日線，睇今次會唔重演四、七及九月一樣，能隨即搵到支持拗腰回升，一係等攻破28,798點浪頂追勢開好倉。繼續悶在現28,100至28,650點，開大開細都得，穩陣計只能等大市話畀大家聽佢想點走。
John Mullen