Market Insight：中國建築現價博得過

先睇吓中資個股，中國建築（03311）早前宣布八供一，每股供11.33元，料集資不少於63億元用作進一步業務發展及擴展，以及一般營運資金。

大股東乘機增持

是次供股由控股股東中國海外集團包銷，由於供股僅獲85.26%認購，故控股股東變相得以藉包銷供股增持，持股量由60.67%增至62.31%。不過，呢幾日中國建築股價好似食錯藥，昨日以全日低位10.96元收市，即係話依家入場買，仲平過供股價。

睇番數據，集團今年首九個月累計新簽合約額810億元，相當於全年目標的81%，照計全年要達標冇大難度，而截至九月底其手頭總合約金額約3,193億元，當中1,896億元乃未完成合約金額。

咁睇落，經營大致穩定，以現價往績市盈率9倍，息率3厘計，即使再計及供股因素，除非有其他重大不利消息，否則冇咩道理要繼續尋底。實力投資者可以考慮作中長線部署，就當係跟進大股東加注行動，博公司有後續收購等擴展業務的消息跟尾。

港股遲早要爆邊

香港方面，昨日傳來閱文集團（00772）IPO凍資數千億元，新股熱抽緊銀根，加上利率趨升，港元一個月銀行同業拆息抽上九年新高，或多或少對股市造成一定的抑壓作用，故見呢幾日港股都係反反覆覆，變數亦不斷增多，睇嚟遲早要來一次大爆邊，看官宜打醒十二分精神！

內銀股公布季度業績，之前升定的股價現回吐，如工商銀行（01398）昨日跌1.9%、中國銀行（03988）更跌3.4%，反而股價一直落後於同業的農業銀行（01288）就升0.8%，收報3.67元。

綜觀大行睇法，大型銀行如建設銀行（00939）及工行的季績對辦，繼續成為內銀股首選，而中小型內銀的經營情況亦有回穩迹象，但傾向睇埋末季再下判語。整體而言，末季十月開始至今，內地經濟持續趨穩，相信大型內銀股年度業績有一定保證，橫睇豎睇，估值合理而且息率吸引，中長線可以繼續放心持有。

中糧包裝「坐七望八」

個股方面，中糧包裝（00906）公布對清遠加多寶草本增資20億元人仔，是次交易作為正式入股加多寶，除咗可以鞏固公司在包裝行業的地位之外，亦可藉着推廣涼茶產業，提升估值，難怪昨日股價高開見5.59元後，頭也不回，尾市更一度抽高至6.6元，收報6.54元，升22%。班芬佬睇得咁好，照計中長線「坐七望八」冇走雞。

醫藥股白雲山（00874）近日股價破頂後繼續上衝，昨日高位一度見27.65元，收報27.4元，升10.48%，成交2.69億元。其A股（600332.SH）公布正籌劃一項重大事項，可能涉及重大資產重組，故A股昨日起停牌。

A股冇得買，焦點自然去咗白雲山H股。不過，最近經歷過中化化肥（00297）公布重組消息前後的股價表現大走樣，睇嚟炒家都係見好識收，咪吓吓要等到消息出先至識落車，隨時得番個吉！

古勝