恒指的走勢真係令人失望，原以為磨完一輪，終於突破了28,588點這個大時代高位之後，就可扶搖直上，劍指30,000點啦！等我於今年七月時仲同自己啲粉絲講，話恒指於年內突破28,588點的話，我們就去食鮑魚慶祝！好彩我未食，否則肯定又會畀人話我高調認叻，燈死個市！
近日外圍股市日日創新高，連滬綜指都突破了3,400點喇，我們的恒指就郁都唔郁，困死於28,094至28,588點之間這500點內，成交又少，正在等甚麼似的。
個市悶，無嘢好炒。就算炒上的，好多都係即日鮮。搞到我寫文都無大題材，今次惟有寫吓個股，當係gossip。我今次同大家聊聊的係內需。一般人提起內需，總是離不開食的、飲的、着的，事關內地有成十三、四億人，真係不愁market。
不過，我今次要講的是更符合國情的，就是生育。一隻是生產早洩噴劑的勵晶太平洋（00575），另一隻是收購了避孕套業務的華夏健康產業（01143）。這兩隻股既可擁抱開放二孩政策的機遇，又能夠捕捉人滿之患所帶來的關注，嗰種一凹一凸的互補簡直玩晒！
不過唔好誤會喎！我是不會推這些畀大家的。為甚麼呢？首先，兩間公司於目前都是虧損的；再者，他們的股價都是「山頂碌落山腳型」，如果不是有新業務的消息，股價於低位的波動真係連用放大鏡都睇唔到啦！
再講，講故事係sexy的，但能否反映於業績甚至係扭虧為盈呢？都係要放長雙眼睇。要跟國策來投資醫療健康產業，都係揀番有盈利的藥品股罷啦！
富昌金融研究部總監 譚朗蔚（作者為註冊持牌人士）