Market Insight：後市態度轉向保守

滬綜指升穿3,400點大關，但港股經歷上周四急插逾500點後，似乎有些少洩氣。內銀及騰訊（00700）均插水，單係騰訊昨日已佔恒指點數跌幅的四成三，拖住個市失守20日線，成交縮到得番842億元。與其歸咎於超購肯定爆燈的閱文（00772）招股抽走游資，古勝則認為同十九大過後港股未搵到新炒作主題，有更大的關連。

半新股眾安在綫（06060）受中保監海南保監局一份上網文件拖累，股價一度急挫7.1%，及後網站刪post都無用，埋單都要跌4.7%。中國人壽（02628）首三季股東應佔溢利268.2億元人仔，按年升98.3%。與第二季比較，國壽期內保費收入增速加快，淨投資收益率也明顯有改善，昨日內險股得國壽獨跌，份成績表無問題，睇吓今日有冇機會追落後。

中興似有回勇之勢

中興通訊（00763）首九個月賺39.05億元人仔，按年升36.5%，公司盈喜預告全年賺43億至48億元人仔，九個月相當於預告金額的81.4至90.8%，似乎早前盈喜仲係估得偏向保守。

上周交銀指市場期望過大的報告引發震倉，股價由今浪浪頂31.1元落到最低23.85元，跌唔穿50日線，過去三日低位逐步往上移，有迹象又再熱鬧起上嚟，走勢同盤路睇，要撈番佢。

美股震盪影響難料

港股「逢七必冧」魔咒能否打破，捱多兩個月就水落石出，但唔少人近排都開始對後市態度轉向保守。以往牛市水尾，往往見二三線股雞犬皆升，反觀近年個市芬佬炒大唔炒細，莊家及大媽炒大價股經已不亦樂乎。細價股完全無鑊氣，即使恒指企住兩萬八樓上，個市成交叻極都只係啱啱過千億元，與○七年「港股直通車」同埋一五年大時代交出單日超過2,000億元成交比較，市場熱度仲相差甚遠。

當然唔怕一萬、至怕萬一，美股升到唔識停，「侵侵」稅改若通過會否見光死，又或聯儲局主席人選消息引發震盪，會唔會拖埋港股落水，就真係難估！

古勝