絲絲講場：交易大堂Last Day 紅衫仔千人送別

有影相留念 有懷舊小食

為咗向「紅衫仔」致敬，今日收市後，港交所搞告別紅衫仔派對，仲大搞懷舊Feel，提供懷舊小食，現場設有多個拍攝站，供應影相道具畀嘉賓盡興，直頭有得食有得玩，估計前後腳會有千人出席。

Dress Code當然最好係「紅背心」啦！參加者可帶備昔日於交易大堂着開嗰件「紅背心」嚟開P。至於到時會唔會有「紅背心」送？Sorry，聽講係唔會。

重量級嘉賓撐 請埋券行

股壇老行尊張天生今日亦會出席告別派對，佢有兩件「背心」，一件係早期於金銀交易所嘅編號55「紅背心」，另一件係編號151嘅「綠背心」。可惜佢件背心一早就掉咗，所以今日冇得帶去！

交易大堂喺八六年四會合一時設立，高峰期有過千名「紅衫仔」喺度交易，係本港證券市場嘅Icon。

聽講港交所原打算搞細Party，點知反應太熱烈，規模「升級」。由原本只有港交所主席周松崗同行政總裁李小加，變成請多咗特別嘉賓，包括財爺陳茂波、財庫局局長劉怡翔、證監會主席唐家成等，證券行代表人數仲唔限。可以想像今日收市後交易大堂將會出現一片紅！

余絲韻