文章出街時，剛剛過了八月十五同追月，我衷心祝願粉絲們人月兩團圓！今年我同太太及兩個仔於住了九個月的新屋會所度玩燈籠同食月餅。話時話，於我搬來這個屋苑之前，其實係有段古！
話說五年前的今日，我同太太於西九龍文化區的海濱長廊散步同睇月光。那時我指住九龍站上蓋嗰幾棟豪宅同太太講：「你依家無，但係你將來會有！」仲記得，當時一個心儀單位叫價約「千鬆D萬」，不過講真，在我腦海入面都唔知幾時至買到啦，咪當許個願，冧吓我太太囉！
跟住這五年，你同我都知道香港樓市發生咩事啦！當年的「千鬆D萬」，依家都變咗「兩千萬鬆D」！我又唔係印銀紙的，打份牛工點追喎？於是我咪惟有退而求其次，買了隔離個港鐵站的屋苑囉！
兜咁大個圈，終於都入正題喇：住屋是現時香港年輕人最迫切、要解決的問題，而為了紓緩這方面的緊張，特首可能會在十月十一日的施政報告宣布有關改變農地作住屋用途，甚至係貨櫃屋等措施。
反正大市咁強，粉絲們不妨博大霧，可提前部署一些有農地儲備的地產股，包括恒基地產（00012）、新鴻基地產（00016）同新世界發展（00017）。其中恒地會是我的favourite，因其股價夠強勢，本來都處於all time high，炒埋政策的話，簡直係perfect！
富昌金融研究部總監 譚朗蔚（作者為註冊持牌人士）