Market Insight：重磅股撐得起指數
中秋當日港股高收逾200點，恒指升上28,379點收市，論指數可以話係超晒標。內銀股周二急升後，周三未見大回，都算係硬淨。同日內房股亦有異動，中國恒大（03333）升逾3%，收報30.75元；融創中國（01918）升6.9%，收報40元；中國海外（00688）及碧桂園（02007）分別升2.3%及7.2%收市。
切忌扒逆水開淡倉
照計今日港股最終升定跌，可一定程度反映下周一A股復市走向，惟古勝依然相信，「十九大」會議前，兩地股市許升不許跌，維穩至上。
反正先前大市落到27,300點就跌唔落，大戶選擇盡地一煲買上，炒起重磅的內銀股，同繼續推高重磅的內房股，係正路做法。
若然「侵侵」真係十一月訪華，即係話十九大高層人士底定後首個外國元首訪華，足見中美關係可能進入前所未有的良好階段，對後市有正面啟示。在下都係嗰句，唔信個市繼續上，最多唔玩指數或重磅股，都咪急住開淡倉。
眾安勝在「球場」大
本來唔少好友周三都提早收爐過節，午後市況一度沉寂，但見到隻眾安在綫（06060）發力，吸引炒家目光，結果成功聚到人氣，尾市股價飆到上80.5元，收報80.35元，升近兩成，成交達33億元，市值達353.4億元，比對市值33,188億元的騰訊控股（00700），成交都係得40億元，可以想像眾安真係炒到出煙！
咁到底眾安係咪真係會炒到上紅底價，係咪可以成為下一隻騰訊？古勝都冇水晶球，只係呢隻股係炒股票供求，唔係炒基本因素，咁股票供求實況係點，只有大戶先清楚。
由於班芬佬當呢隻股係今年標尾會精選，繼續炒上去唔出奇，對散戶而言，反正個「球場」夠大，氣氛喺度，一手入場費才幾千銀，好過炒輪，即市跟炒只需要論膽識睇氣勢，少理估值高低。
昂納有條件延續佳績
個股方面，周三見到隻昂納科技（00877）成交急增，股價由低位5.25元抽到上高位見6.2元，收報6.11元，升16.6%，成交達2.15億元。
資料顯示，昂納於今年四月曾以先舊後新配售9,000萬股及認購5,000萬股，按配售價每股5.25元，集資2.63億元，由於大股東變相減持4,000萬股，故見股價其後反覆向下，六月低見3.79元才回穩，七月開始回升至5.5元水平再現整固，回吐4.6元水平現承接，周三一支大陽燭，成交配合，相當醒神，亦確認重上四月配股價上。
睇埋數據，昂納上半年純利增長63%至7,370萬元，預期下半年業務發展將優於上半年。
查實近三個財年，公司的營業額以及純利都有良好增長，相信今年都會有好表現，短線回調可以望多幾眼。
古勝