絲絲講場：新地執董加薪邊個至勁？

新鴻基地產（00016）早前公布二○一七年度嘅業績好靚仔，盈利年增28%，一班執董當然功不可沒啦，而郭氏家族第三代近年上位，亦明顯見到成績，執董加酬金當然有佢哋份。

睇番新地最新年報，執董郭基煇（郭炳江兒子）二○一七年度酬金加幅有30%，由629萬元加到818萬元，加幅算唔錯。

至於郭基煇嘅堂弟郭基泓（主席郭炳聯兒子）二○一六年四月加入做執董，酬金加幅仲勁，係加10.6倍！點解咁勁？查實佢二○一六年度獲發嘅酬金比較少，只得40萬元，今年加咗十倍都只喺467萬元啫，幅度驚人但酬金總額喺咁多位執董入面排尾幾位咋。

至於「樓神」雷霆一向為公司新盤出力推廣，成績有目共睹，酬金只加得6.58%？嗱！睇真啲，「樓神」酬金基數高嘛，佢由二○一六年度嘅2,203萬元，加到二○一七年度嘅2,348萬元，加幅雖然只得百分之幾，但佢個酬金Package已位列咁多位執董之首！

余絲韻

絲絲講場：新地執董加薪 邊個至勁？