孖妹S檔案：跑數食尾胡 券商變橋王
大市今年飆足6,000點後，終於抖抖氣，年內市況雖則靚仔，但孖妹身邊嘅姊妹居然冇乜胡食，想買個Hermès袋都唔捨得；相反，見到券商朋友就成日蓮子蓉面口，又玩變陣，唔通今年靜靜雞賺到唔少，旨在悶聲發大財？
郭：致富證券證券業務主管 郭家安
舖頭轉新裝 未擬增分行
彩兒：嗱，你連Title都轉埋喇，公司實係玩緊新嘢，有好嘢記得帶挈細妹我喎……
郭：咁耐冇見，你都係鍾意亂講嘢，哈哈！致富一向做開嘅證券、期貨等業務都好穩定，現時客戶以網上交易為主，成立咗約一年半嘅理財業務都開始上軌道喇……我哋嘅分行喺近呢一年，有7至8間已經裝修咗，由以往嘅傳統現場位，Upgrade咗做舒適嘅梳化位，同埋一啲私隱度高嘅理財房，一啲主要分區嘅舖頭，好似旺角、黃埔、九龍城等，都已經轉咗新裝，我哋都請多咗有銀行、保險公司背景，有理財業務底子嘅金融人做分行經理。
依家致富有19間分行，香港仔分行暫時結束咗，都有搵緊舖，但係我哋唔急，皆因市傳監管機構有機會准許線上認證開戶，所以亦毋須再增網點。
理財業務增 開戶飆6成
Kitty：致富身為B組行，仲撈埋理財產品，係咪向百足多爪出發？
郭：理財業務以幾何級數增長，不過由於證券業務固有客戶基礎強，所以現時理財業務只佔整體業務單位數字百分比。依家公司會有一隊理財專家喺各分行見客。
雖然今年冇iBond幫手吸客，但開戶情況仲係好好，以今年頭9個月計，比舊年開戶增長咗五至六成，因我哋推出咗新推廣計劃吸各類型嘅客戶，例如「孩子樂」證券子帳戶、現金認購新股有100%認購佣金回贈、新客戶「密密Trade」不設最低佣金等。
藍籌股借貸最高七成
彩兒：上半年證券業整體活躍保證金客戶飆13%至逾30萬人，今年大市咁旺，公司孖展客咪乘勢起舞？
郭：自從輝山乳業（06863）被勒令停牌，六月發生「粉塵爆炸」後，有啲細行直情停開新孖展戶口添，我哋行都收緊咗孖展，你知啦，不嬲致富都係傾向穩健，所以細價股基本上係唔借（口架）……其實今年市道好，都有客戶想借多啲，但係我哋都會跟足Policy，藍籌股好似騰訊控股（00700）同滙豐控股（00005），最高借七成。
其實呢一浪升上去，散戶一般賺錢唔多，主因佢哋揸細價股為主，買大價股嘅客戶係玩開嗰班，佢哋有雄厚實力，大部分都好少借錢。另外，有好多人都寧願唔揸正股，玩衍生工具好過，特別係做好多股票期權，例如騰訊Long Call（買入認購期權）。
鄺：凱基證券亞洲執行董事 鄺民彬
拒打價格戰 業務求多元
Kitty：上半年A組經紀淨盈利比舊年下半年勁升8倍，凱基今年成績點？
鄺：今年大市累升兩成，成交暢旺，對券商生意係有帶挈，但係競爭都好劇烈o架嘛！不斷有中資券商加入戰場，連二、三線內地券商都嚟香港插旗喇，當中部分券商搞免佣優惠喎，梗係有衝擊啦，我哋都有下調交易佣金嘅機會，但係就一定唔會打價格戰喇，會力求令業務趨向多元化嚟突圍。
我哋當然要加強固有券商業務啦，另外都要提升機構客戶銷售、投行業務同埋資產管理業務。以前客戶鍾意打畀經紀落盤，依家今時唔同往日，佢哋鍾意網上落盤、做投資，所以亦需要打造多元化投資平台，推動業務間協同，同埋交叉銷售。
孖展唔亂借 取態審慎
彩兒：我哋喺證監會度八到，A組證券行上半年咁風光，主要受惠於利息收入大增喎。
鄺：因為今年多隻新股都有睇頭，來自新股嘅孖展業務成績靚仔；不過因應早前爆發小型股股災，證監喺孖展業務上係收緊咗，我哋都睇到來自孖展業務盈利增長係有，但係取態都仍然傾向審慎，唔會亂借o架。凱基喺香港做咗20年，孖展業務極少有大損失，事關我哋係好重視評估客戶同上市公司質素，好似客戶嘅風險承受能力，同埋抵押品質素咁，做好風險管理先係王道。
鄺：我哋嘅股票抵押借貸生意，都會比主流保守，不過就唔係硬性規限嘅，要視乎每次情況，一般藍籌股可以借六至七成；二線股就三至四成；活躍三線股就一成；細價股基本上唔按。
今年攬實「四寶」穩賺
Kitty：凱基依家分行數目唔多，唔通你哋啲客唔蒲魚缸？
鄺：現時除咗總行，仲有6個營業據點，暫時都唔會開新舖住喇……其實好揼心啊，今年好多股友都跟唔到潮流走，唔少人坐住舊時資源股、航運股嘅貨，又或者係其他二、三線，甚至三、四線股，所以享受唔到呢一浪升市。
其實今年都唔使做太多股份分析，攬住「投資四寶」就已經可以袋袋平安，「四寶」分別係盈富基金（02800）、恒生H股（02828）、安碩A50（02823）、華夏滬深三百（03188），皆因佢哋往往係資金追買嘅對象，可惜散戶成日嫌棄基金升勢慢、大價，寧揀細股仔啦。
後市預測：尾季料更旺 明年未必順
Kitty：你都明啦，一剎那光輝唔代表永恒，我啲姊妹真係勁驚出現十月股災。
提防縮表加息衝擊
郭：其實以依家市況睇，除非出現黑天鵝，好似金仔射導彈，點知就射中咗日本之類，現時市況未去到爆破之時，第四季市道應該再旺啲，主因有大型新股上市，而且A股又突破橫行區、走勢向上，美股近兩個月冇咩特別，相信都可以玩到年尾。
彩兒：唔通港股出年會出現驚世大調整，我唔襟嚇o架喎！
鄺：我認為，環球股市如果冇灰犀牛同黑天鵝，市況就仍然偏好，不過，出年就未必咁順風順水喇，今年正係因為美元弱勢，資金重返新興市場，低估值嘅港股就乘勢追落後，雖然現時估值比起環球市場仍然唔高，但喺聯儲局縮表，再加埋加息之下，美元有機會強番，對新興市場股市，以至港股都有機會造成打擊o架，你哋記得要小心啲啊……
Kitty：嘩，咁即係要（目及）實耶倫BB去向啦，佢心情一差咪死？哈哈。
Kitty 彩兒