Market Insight：中興5G概念有排炒

睇番今年WWRF，電訊設備大廠愛立信預測，五年之後全球5G用戶人數會達5.5億，另一間科技巨擘高通預測到二○三五年，5G會為全球提供12.3萬億美元產值，2,200萬個就業機會，真係唔講得笑。

一如3G升到4G，第五代流動通訊系統，5G的最大特點就係快，速度峰值達10Gbps，同依家的4G比，猶如法拉利同牛拉車，唔好話幾秒間成套3D高清片完全下載，串流8K電影都仲綽綽有餘，唔單止穩定性及速度大大提升，亦比4G更省電，令移動裝置續航能力大大提升，適合需要長期連線的嶄新功能。

近期但凡涉及電訊設備、光纖的公司都見熱錢捧場，如南方通信（01617）、中國優通（06168）、長飛光纖光纜（06869）及昂納科技（00877）統統落鑊。套用3G到4G經驗，往往係行業龍頭好似華為、中興通訊（00763）等最先得益。

過去一年中興股價慢火煎魚，八月縮落20元樓下打底，近排炒5G概念交投又轉趨活躍，升得愈來愈快，有機會成新一浪北水狂炒的暴動股，趁A股休市，如有機會縮番25元樓下，不妨諗諗佢。

末季投資加倍審慎

基金季結加埋長假前夕，上周五港股輕易先跌後拗腰回升，但埋單計連升八個月紀錄仍要終斷，似預兆港股進入十月的傳統股災月份，前路未必像之前的幾個月咁平坦。

港股A股化之下，愈來愈受內地資金喜好左右，早已是公開秘密。A股進入十一長假期，大媽唔玩，相信港股交投會更靜局。大市近期在50日線水平患得患失，今次恒指可唔可以翻版四月及七月，一跌穿50日線支持即刻反彈，實屬難料。

大環境方面，有聯儲局正式收水兼啟動縮表，牛三的美股唔識驚，唔代表香港唔受影響。更重要係，連升八個月後，唔少中港股票基金即使未埋數，但早已篤定今年回報肥過肥仔水，諗緊年尾份花紅點使的芬佬，仲會唔會磨爛席博到最後一季？抑或趁個市有少少轉勢，開始計數食胡？值得大家三思。始終八個月升咗近六千點，短時間回番一、兩千點絕對唔出奇。

新能源車股打鐵趁熱

自從內地工信部話要逐步以新能源汽車，代替傳統的汽油及柴油汽車，比亞迪（01211）升到唔識停，未到一個月，由50元樓下起步，一度衝到上79.3元，差幾蚊返到○九年87.3元的歷史高位。

比亞迪搭轉順風車

歐洲同中國都話全面轉用電動車，係咪就可以解決溫室氣體排放問題？古勝仍有些少懷疑，不過，既然全世界都趕潮流，實在無謂同錢鬥氣。摩通啱啱出份報告，就唱到比亞迪天上有地下無，搵Audi首席設計師Wolfgang Egger加入之後的第一炮「宋Max」，以及一八年陸續推出的「唐」、「元」及「秦」幾款新車，都好大機會成為同級車款中的銷售殺手，目標睇一舊水。

喺過去兩、三星期股價表現，對比亞迪新車系大賣深信不疑的大孖沙絕對唔少，一於睇本周有冇機會趁佢回返到70元邊，搭番一轉順風車。

古勝