絲絲講場：羅傑斯唔怕熊 最驚「蠻牛」90後

佢話，呢啲廿幾歲嘅，心口一個「勇」字，最啱喺牛市度衝，尤其係當有泡沫嘅時候，事關喺呢班後生嘅眼中，牛市係直到永遠嘅，佢哋總有一堆理由去支持佢哋自己嘅睇法，但係當牛市結束就會「出事」。

就好似羅傑斯一個學生咁，喺九十年代尾，呢位學生僅用兩年就幫公司勁賺五倍，公司錫晒佢，但之後一年（科網泡沫爆）話咁快就輸清光，立即失寵變地底泥，呢位學生當時只得28歲。

債務水平高遲早爆煲

羅傑斯仲話，呢班後生賺到好多錢，但賺時唔知自己點解賺，所以輸錢時亦唔明白點解輸，總之就係唔知發生緊咩事咁啦。當然，佢唔係話啲廿幾歲嘅「冇個掂」，只不過喺逆境市時，似乎都係啲資深嘅較撐得住。

講番美股牛咗八年，點解話新一輪熊市會最駭人？羅傑斯話要歸咎於全球經濟嘅債務水平喎。

佢早幾日先又講過，若美國向中國實施大規模貿易制裁，會迫使中國與俄羅斯等國家行埋啲，結果令美國失去金融霸主地位，最傷嘅係美國自己。羅傑斯雖非第一日睇淡美國市場，但近排講得咁密就好少見，唔通佢睇到啲咩？

余絲韻