本周聯儲局會議可能宣布縮表，但似乎無阻港股衝頂，恒指周一又再上破28,000點關，以接近全日高位28,159點收市，乃一五年五月下旬以來新高。睇嚟「十九大」前兩地股市冇得跌的說法係堅，咁講法，呢轉整固後再上，恒指有機會挑戰一五年大時代高位28,588點。
騰訊（00700）繼續復強，周一股價再創歷史新高346元，升2.1%，成交達63億元。呢隻股由中資主導，與昔日英資時代的大笨象（00005）股價受制經濟周期及景氣因素不同，股王騰訊係新經濟股的領頭羊，喺內地差唔多做緊獨市生意，業務性質同市場定位都比較獨特，升跌都唔需要太多理由，無論係大戶定小戶，都係「信」者得救！
A股慢火煎魚，為港股打強心針。券商股見異動，中信證券（06030）急升逾8%、海通證券（06837）升4%、中國銀河（06881）及HTSC（華泰證券）（06886）同升逾5%、中金公司（03908）升6.8%。
兩地金融股氣氛向好，港股成交又突破千億元，上升股票當然唔少得港交所（00388），股價一度飆到上219.2元。
古勝相信，中資券商股已過最低潮，在內地製造業及出口等經濟環節開始放緩之下，下半年A股將擔當一定的「穩增長」角色，故券商股中線有可為。除咗券商股，內險股亦可受惠於A股氣氛改善，若然有信心港股呢轉要破頂，呢一刻追內險股仲趕得切。至於港交所，股價仍與升軌底部距離不遠，睇好後市，可以順勢留意相關衍生工具，博呢浪抽穿八月高位233.2元。
汽車股亦繼續強勢，吉利汽車（00175）再創新高見22.45元，收報22.35元升7.7%。新能源車股比亞迪（01211）唔經唔覺已突破60元大關，周一高見62元，已逼近一五年大時代高位，成功破頂的話，照計唔會咁快玩完，能否重遊○九至一○年的高位七、八十蚊，就要睇產業消息配唔配合。都喺嗰句，龍頭股轉運，板塊內二、三線股等住輪流炒上，勤力啲做吓功課尋寶啦。
古勝