絲絲講場：鱷王獨門武器堅係掂！
「鱷王」達利奧（Ray Dalio）領軍嘅Bridgewater，貴為全球最大對沖基金，成功之道當然令人好奇。
達利奧近期一改神秘作風，多咗講其獨特管理制度同企業文化，佢最近仲話打算將自創嘅管理應用程式公開，等其他公司都可以用到佢嘅「獨門武器」！
自創評分App 員工互批
「獨門武器」包括：容許員工互相評分嘅Dot Collector、用作記錄情緒嘅Pain Button、概括晒員工優點缺點嘅Baseball Cards，所有應用程式嘅共通點係全公司都睇到。聽講已經有幾家大型科企有興趣用，估計18個月後試行。
Bridgewater向來鼓勵員工互相批評，平時個個邊開會邊喺部iPad用「Dot Collector」App互相評分，與會者可即時睇到其他人對自己以至其他同事嘅評分，各種平均分就會記錄喺各自嘅Baseball Cards上。
呢種無時無刻擺明互插嘅極端風格，你又係咪接受得到？鱷王話自己成功有今日都因為咁，仲講到明「呢度唔係烏托邦，係現實」咁話。
鱷王雖然歡迎大家互片，但唔係畀你揸主意！系統早就將員工分類，被視為「可信程度低」者嘅意見自動被Out！鱷王公司邊個「可信程度」最高所以最有權話事？你話呢。
余絲韻