Market Insight：教育股睇埋隻網龍

最近有老友舉家移居上海工作，怕家中兩隻小魔怪唔適應，搵國際學校落腳，計埋匯水學費居然貴過香港嗰間。以內地平均收入稍低於香港家庭，可以相像，內地「虎媽虎爸」在小朋友身上使錢的狠勁，比香港有過之而無不及。

既然錢途無限，近排內地教育股完全無受牛皮市影響，昨日開始成交減少下的井噴式爆升，明顯係貨乾到無朋友。睿見教育（06068）升7.9%、新高教集團（02001）升9.5%、宇華教育（06169）升11.5%、民生教育（01569）升12.1%，慢咗幾拍先落鑊的楓葉教育（01317），一升就17.8%。唔想臨急抱佛腳逐隻去刨，不如睇吓隻網龍（00777）。

呢隻網上教育股，早前出業績虧轉盈之後，股價炒到上34.35元，抖氣抖咗個幾星期，喺30元邊打咗底，有整裝待發迹象，不妨留意。

散戶未進入狂熱狀態

美股周二晚繼續做好，標普500指數再創出歷史新高，港股唔多爭氣，昨日現貨成交唔多夠火力，兩萬八點可望而不可及。恒指埋單跌78點收報27,894點，氣氛繼續係炒股唔炒市。

一五年港股大時代，恒指造出28,588點的海嘯後新高，兩年過後，恒指再次舊地重遊。客觀環境，是港股連升八個月，基金經理開始見有畏高現象，數百點的水位，實在不易打動他們此刻傾力入市，挑戰阻力。

不過，觀乎證券行的散戶熱度仲係相當低，市場游資未有耐出現爭先恐後的場面。古勝預計遲早都會往上衝多浸，問題是大藍籌業績之後，暫時沒有炒上的藉口，大家惟有以逸待勞，睇形勢好大機會係「十九大」前夕的維穩行情。

體品股靜極思動

蘋果公司公布咗新iPhone詳情，相關概念股昨日個別發展，舜宇光學（02382）及瑞聲科技（02018）仍能向上，但丘鈦科技（01478）、高偉電子（01415）皆見回吐。不過，最矚目的iPhone X要十月下旬先有得賣，會唔會可以拖延今次概念股的炒作浪潮？就不得而知。反正短期板塊氣氛個別發展，尤其係二三線股要抖抖氣，就忍忍手咪咁心急撈貨。

消費周期復甦

反而，見到一個好耐冇炒過的板塊有異動，就係體育用品股。361度（01361）昨升逾半成，安踏體育（02020）亦升近半成，李寧（02331）則升逾1%。主要係有投行睇好內地消費周期復甦，其中安踏更獲調升評級，帶動板塊氣氛。

唔講唔覺，原來隻361度由八月下旬2.9元水平，反覆升抵昨日高見3.85元，累升逾三成，若單以中期業績見增長論之（純利增16%，毛利率提升0.9個百分點至42.3%），股價累升幅度足以反映利好因素。若然有貨，不妨考慮趁高食胡，換入呢浪相對落後的李寧，若能以大成交突破6.5元，可再展新升浪，參考高盛最近報告，目標睇到8元。

古勝