中國大淡友兼世界最大沽空對沖基金之一Kynikos Associates掌門人錢隆斯（Jim Chanos）話睇淡頁岩股，又話佢目前正沽空美國電動車「龍頭」生產商Tesla（特斯拉），嫌呢隻股太神化喎。咁你又跟唔跟？
點解咁問？話說錢隆斯近年似乎做咗「明燈」，好似佢嘅基金早喺一五年已沽空阿里巴巴，不過佢呢排終於話雖然仍然對阿里盤數有疑問，但認喺一月已經平咗倉。睇嚟似慘輸離場。
又好似舊年六月，佢重申睇淡中國，狂言係「天賜嘅沽空禮物」，仲話喺香港國指累積淡倉。今時呢鋪「大茶飯」睇嚟亦已夢碎。仲有今年五月佢又預期金融市場已炒定副總統彭斯會接替總統特朗普。結果？特朗普今時今日仲安然無恙。所以，今趟係唔係應該瞓身買Tesla先！
余絲韻