絲絲講場：張華峰搞派對告別「紅衫仔」
俗稱「紅衫仔」嘅出市代表將於十一月退役，完成歷史任務。為咗紀念「紅衫仔」光榮引退，立法會議員張華峰將於本周五喺馬車會所搞「紅衫仔派對」，聽聞派對陣容龐大，已召集咗超過一百個以往屬遠東會嘅「紅衫仔」出席，仲請咗唔少猛人，包括股壇老行尊董偉、黃宜弘等出席！
張華峰話今次派對反應熱烈，原本應承出席嘅「紅衫仔」人數更多，但礙於場地所限，包晒全層都坐唔落，所以只有百多人出席。
張華峰以往係屬遠東會，所以今次搵番遠東會班老友記「紅衫仔」出來，好多早已退休，好耐冇見，今次派對既敍舊又細說歷史，緬懷過去「紅衫仔」光輝歲月！
余絲韻