丘鈦科技（01478）是我由細湊到佢大的。我由4.36元開始推介及持有，到業績期前再於9.6元增持，炒佢入深港通，再於15蚊的齊頭位領粉絲出貨，大掘一筆。本月初，我以「丘鈦已經變咗質」來撰文，同粉絲交代番點解我已經無咁愛佢喇，原因是佢已非我認識嗰隻丘鈦，而變成一個畀台灣新鉅科技（3630.TT）牽着鼻子走的傀儡。我當時對燈火講：「15蚊以上的丘鈦同我再無關係！」
半個月啫，佢的股價已經從前高位23.25元回落到15蚊邊喇，主要是由於管理層主動下調了盈利增長的預測，從原來的25%增長降至10%以上。他們的解釋係：第一是產能跟不上需求的增長；第二係隨着雙鏡頭的普及，雙鏡頭的產出於統計上已經當一顆計了。
丘鈦股價於周一大跌之後，周二上午停牌並發出了澄清，然後股價又飆了9%。莫非投資者的信心已經返番嚟？我認為只不過係語言偽術囉！雙鏡頭當單鏡頭計，就會影響出貨量？咁點解舜宇光學（02382）於同日發布的出貨數據又錄得按年同按月俱升呢？增長慢了就是慢了，唔好同我拗formula！
這無疑係科技股份的致命傷！我成日同大家講：騰訊控股（00700）股價之所以無限破頂，係由於佢每年、每半年同每季都deliver到高增長，滿足到市場對佢的期望。於是乎，再高的估值都得以justify，股價自然天空是頂。只是丘鈦今次就麻煩喇，於我的心目中，佢簡直捉蟲！增長放慢，又要自己講出來，真係食咗誠實豆沙包咩！
本來，我還認為「高增長的丘鈦」會於15蚊的橫行位找到支持的，但如果佢變成了「低增長的丘鈦」的話，那好明顯佢已經唔係我初戀時候的模樣喇！當下我惟有袖手旁觀，keep貨底但已經係雞肋，加貨就免喇！
富昌金融研究部總監 譚朗蔚（作者為註冊持牌人士，持有騰訊、舜宇及丘鈦）